26-sentabr, payshanba kuni Nukusda “Barqaror qishloq hududlari rivojlanishini qo‘llab-quvvatlash orqali Orolbo‘yi mintaqasida inson xavfsizligining dolzarb muammolarini hal qilish” qo‘shma loyihasini ishga tushirish marosimi bo‘lib o‘tdi. Bu haqda O‘zbekistondagi Birlashgan Millatlar Tashkilotining Taraqqiyot Dasturi matbuot xizmati xabar berdi.
Bu BMTning O‘zbekistondagi Orolbo‘yi mintaqasi uchun Inson xavfsizligi bo‘yicha ko‘psheriklik trast fondi (IXKTF) tomonidan moliyalashtirilayotgan birinchi loyiha bo‘lib, uning budjeti 1 463 900 AQSh dollariga teng.
Loyihaning maqsadi mintaqadagi eng zaif jamoalarda Orol dengizi inqirozi natijasida vujudga kelgan ekologik, ijtimoiy va iqtisodiy oqibatlarni yumshatishdir. Asosiy tadbirlar shu yo‘nalishda yechimlar majmuasini ishlab chiqish, Qoraqalpog‘istonning Taxtako‘pir, shuningdek, Mo‘ynoq va Chimboy tumanlarida aholi uchun ijtimoiy xizmatlardan foydalanish imkonlarini yaratish, turmush darajasini oshirish va barqaror turizmni rivojlantirishga qaratilgan.
“Orolbo‘yi mintaqasiga ko‘mak ko‘rsatish masalalari BMTTD uchun muhim ahamiyatga ega, biz mintaqadagi ishtirokimizni kengaytirish bo‘yicha ishlarni davom ettiramiz.
Ushbu yo‘nalishdagi hamkorlikka yangicha yondashuv O‘zbekiston Prezidentining Orolbo‘yi hududida ekologik innovatsiyalar va texnologiyalar zonasini yaratish tashabbusiga asoslanadi. Shu nuqtai nazardan, BMTTD mintaqada Barqaror Taraqqiyot Maqsadlariga erishish uchun innovatsion yechimlarni amalga oshirish bo‘yicha jahon tajribasini taklif etadi”, — dedi BMT Taraqqiyot dasturining O‘zbekistondagi doimiy vakili Matilda Dimovska marosim ishtirokchilariga qaratilgan tabrik nutqida.
Loyihani amalga oshirish natijasida 2230 dan ortiq qishloq aholisiga ichimlik suvi yetkazib beriladi, 1000 dan ortiq zaif jamoalarning vakillari kichik va o‘rta biznesda, shuningdek, ekoturizm sohasida daromad olish imkoniyatlarini kengaytiradilar. Orol dengizining qurigan tubida o‘rmonzor barpo etish orqali iqlim o‘zgarishiga moslashishda ham ko‘mak ko‘rsatiladi.
IXKTF loyihaviy takliflari uchun arizalar dastlabki qabul qilinishi joriy yil boshida e’lon qilingan edi. Bunda ustuvor yo‘nalishlar sifatida ekologik xavfsizlikni ta’minlash, sog‘liqni saqlash sohasida xavfsizlikni ta’minlash hamda ijtimoiy xavfsizlikni ta’minlash, shu jumladan, asosiy kommunal xizmatlardan, ijtimoiy himoya, suv ta’minoti, sanitariya va ta’lim sohalaridan foydalana olish imkoniyatini yaxshilash belgilangan edi.
Jamg‘arma faoliyatida ishtirok etuvchi tashkilotlar tomonidan umumiy qiymati 4,23 million AQSh dollari qiymatiga ega beshta loyiha taqdim etilgan edi. Hukumat, BMT tashkilotlari, donorlar — Yevropa Ittifoqining O‘zbekistondagi delegatsiyasi, Yaponiya elchixonasi, mahalliy NNT vakillaridan iborat Boshqaruv kengashi tomonidan loyiha takliflari o‘rganib chiqilgandan so‘ng umumiy qiymati 3,085 million AQSh dollariga teng ikkita loyiha tasdiqlandi.
Orol dengizi mintaqasi uchun IITFB xalqaro hamkorlikni rivojlantirish va donorlik hamjamiyatining mablag‘larini safarbar etish orqali ekologik, iqtisodiy, oziq-ovqat, ijtimoiy xavfsizlikni ta’minlash, aholi salomatligini yaxshilash uchun noyob yagona platforma hisoblanadi.
Izoh (0)