Қозоғистон Ўзбекистон туфайли чорва олиб чиқилишини чекламоқда. Бундан кўзда тутилган асосий мақсад назоратсиз экспортга чек қўйиш эканлиги айтилмоқда, дея хабар беради «Kazinform».
«Қозоғистон гўштдан кўра кўпроқ чорва экспорт қила бошлади. Бу йирик шохли қорамол ва қўйлар. Жорий йилнинг ўзида чорва экспорти икки бор ўсди. Экспорт сиёсатини бу йўналишда ўзгартириш зарур», — деди маҳаллий сенатор Али Бектаев.
Мамлакат қишлоқ хўжалиги вазири Сапархан Умаров ушбу йўналишда олиб борилаётган ишлар ҳақида маълумот берди.
«Бугунги кунда урғочи мол олиб чиқишга тақиқ қўйилди. Республикада чорва экспортга, асосан, Ўзбекистонга олиб чиқиладиган 78 та бўрдоқига боқиш пункти борлиги аниқланди. Биз улардан 50 тасида хорижга чорва олиб чиқилишини тақиқламоқчимиз, кейин эса вазиятни назоратда ушлаб турамиз. Ҳозирда гўштни қайта ишлаш комбинатлари билан музокаралар олиб бормоқдамиз. Уларга чорва етказиш учун субсидиялар жорий қилмоқчимиз. Ҳозирда мамлакатда 175 та қайта ишловчи корхона фаолият кўрсатмоқда, бироқ уларнинг қуввати атиги 38-40 фоизни ташкил этмоқда», — деди вазир.
Бунга жавобан депутатлар чорвани четга олиб чиқишга тўлиқ тақиқ жорий этишни таклиф қилди. Мазкур масала мамлакатда охирги ойларда қизғин муҳокама қилинмоқда ва чорвадорлар икки тарафга бўлинди: кимдир тақиқни ёқлади, кимдир қарши чиқмоқда.
«Бу масала ҳозирда кўриб чиқилмоқда», — таъкидлади Умаров.
Изоҳ (0)