Qozog‘iston O‘zbekiston tufayli chorva olib chiqilishini cheklamoqda. Bundan ko‘zda tutilgan asosiy maqsad nazoratsiz eksportga chek qo‘yish ekanligi aytilmoqda, deya xabar beradi “Kazinform”.
“Qozog‘iston go‘shtdan ko‘ra ko‘proq chorva eksport qila boshladi. Bu yirik shoxli qoramol va qo‘ylar. Joriy yilning o‘zida chorva eksporti ikki bor o‘sdi. Eksport siyosatini bu yo‘nalishda o‘zgartirish zarur”, — dedi mahalliy senator Ali Bektayev.
Mamlakat qishloq xo‘jaligi vaziri Saparxan Umarov ushbu yo‘nalishda olib borilayotgan ishlar haqida ma’lumot berdi.
“Bugungi kunda urg‘ochi mol olib chiqishga taqiq qo‘yildi. Respublikada chorva eksportga, asosan, O‘zbekistonga olib chiqiladigan 78 ta bo‘rdoqiga boqish punkti borligi aniqlandi. Biz ulardan 50 tasida xorijga chorva olib chiqilishini taqiqlamoqchimiz, keyin esa vaziyatni nazoratda ushlab turamiz. Hozirda go‘shtni qayta ishlash kombinatlari bilan muzokaralar olib bormoqdamiz. Ularga chorva yetkazish uchun subsidiyalar joriy qilmoqchimiz. Hozirda mamlakatda 175 ta qayta ishlovchi korxona faoliyat ko‘rsatmoqda, biroq ularning quvvati atigi 38-40 foizni tashkil etmoqda”, — dedi vazir.
Bunga javoban deputatlar chorvani chetga olib chiqishga to‘liq taqiq joriy etishni taklif qildi. Mazkur masala mamlakatda oxirgi oylarda qizg‘in muhokama qilinmoqda va chorvadorlar ikki tarafga bo‘lindi: kimdir taqiqni yoqladi, kimdir qarshi chiqmoqda.
“Bu masala hozirda ko‘rib chiqilmoqda”, — ta’kidladi Umarov.
Izoh (0)