YouTube’даги War on Fear каналида Хитойнинг Уйғур-Шинжон автоном туманида дрон камера ёрдамида тасвирга туширилган видеоси жойлаштирилди. Тасвирда юзлаб кишанланган одамларнинг кўзи боғлиқ ҳолда ерда ўтиргани ва кейинчалик полициячилар томонидан олиб кетилаётгани акс этган.
The Guardian’га асосланиб Fergana нашрининг хабар беришича, дрон ёрдамида уйғурлар ва Шинжондаги бошқа миллатга мансуб маҳбусларнинг бошқа қамоқхонага кўчирилиши тасвирга олинган.
Видеоёзувда Хитойда оммалашган услубда сочлари қириб ташланган сариқ формадаги кўзлари боғланган маҳбусларнинг бошқа ерга кўчирилиши тасвирланган.
Ролик тармоқда ўтган ҳафтада, 17 сентябрь куни пайдо бўлган. Австралия Стратегик сиёсат институтининг (Australian Strategic Policy Institute) Кибернетик сиёсат бўйича мутахассиси Натан Русер роликда қуёшнинг жойлашуви ва бошқа шароитларни таҳлил қилган ҳолда бу жой Шинжоннинг энг катта иккита шаҳридан бири жануби-шарқда жойлашган Корланинг ғарбий қисмидаги темирйўл станцияси эканлиги ва воқеалар 2018 йил августида бўлганини аниқлаган.
«Пекин ғарбий провинцияни хитойлаштиришга уринмоқда. Уйғурларга қарши Шинжонда оммавий босим ўтказилаётгани ҳақидаги маълумотлар тарқалиши натижасида ғарбдаги ҳуқуқ ҳимоячилари ва ОАВ эътиборида бўлиб турибди. Ушбу босим «қайта тарбиялаш лагерларида» уйғурлар ва бошқа кам сонли миллатлар вакилларини хитой тилини ўрганиш, Хитой коммунистик партиясини улуғлаш ва бошқа қоидалар тўпламини эслаб қолишга мажбурланмоқда», — дейилади хабарда.
2018 йил октябрида Хитой ҳукумати илк бор бу каби лагерларнинг мамлакатда мавжуд бўлганини расман эълон қилган. Австралия Стратегик сиёсат институти ўшанда ўз расмий сайтида эълон қилган тадқиқот хулосаларида лагерлар сони Шинжонда икки бараварга кўпайгани қайд этилганди.
Изоҳ (0)