Мирзо-Улуғбек Абдусаломов: Бутун оила номидан бир кишининг овоз бериб кетишидек эски «касаллик»нинг илдизи қирқилади

Ўзбекистонда сайлов жараёнларини бошқаришнинг ахборот тизими ва сайловчиларнинг Ягона электрон рўйхати жорий этилмоқда. Бу ҳақда Марказий сайлов комиссияси раиси Мирзо-Улуғбек Абдусаломов маълум қилди, дея хабар бермоқда «Дарё» мухбири Мусулмонбек Иброҳимов.

22 декабрда Олий Мажлис Қонунчилик палатаси ва маҳаллий кенгашларга сайловлар бўлиб ўтади. 20 сентябрдан сайлов кампаниясига старт берилган, 24 сентябрь куни эса сайловларда қатнашадиган беш партия — Тадбиркорлар ва ишбилармонлар ҳаракати – Либерал-демократик партия, «Адолат» социал-демократик партияси, «Миллий тикланиш» демократик партияси, Халқ демократик партияси ҳамда Экологик партиянинг ваколатли вакиллари рўйхатга олиниб, уларга сайловчиларнинг имзоларини тўплашлари учун белгиланган намунадаги имзо варақалари топширилган.

Мирзо-Улуғбек Элчиевичнинг таъкидлашича, 2019 йилги парламент сайловлари илк бор «халқаро нормалар ва стандартларга жавоб берадиган, ихчам», 18 боб, 103 моддан иборат Сайлов кодекси асосида ўтказилади. Бундан ташқари, миллий сайлов тизимига сайлов жараёнларини бошқариш ахборот тизими ва сайловчиларнинг Ягона электрон рўйхати ҳам жорий этилмоқда.

«Ушбу тизим ҳуқуқий тажриба сифатида 2017 йил декабрь ойида Тошкент шаҳрида халқ депутатлари туман кенгашлари сайловида синовдан ўтказилган эди. Ушбу тизимга сайловчиларнинг яшаш жойлари бўйича маълумотлари киритилади ва ‘бир сайловчи — бир овоз’ тамойили асосида иш юритилади. Бунда сайловчиларни турли жойларда бир неча марта рўйхатга кириб қолишларини олди олинади. Бундан ташқари, бутун оила номидан бир кишининг овоз бериб кетишидек эски «касаллик»нинг илдизи қирқилади», — деди МСК раиси.

Ҳозирда имконияти чекланган фуқароларнинг сайлов участкаларига келиб-кетиши, эркин ҳаракатланиши учун қулайликлар ҳозирланмоқда. Таъкидланишича, участкаларга Брайл алифбосида бюллетенлар ва ташвиқот материаллари етказилади. «Номзодлар билан учрашувларда ҳам имконияти чекланган фуқароларнинг иштирокини таъминлаш ва фаол иштирок этиши учун шароит яратишга ҳаракат қилмоқдамиз», — дея қўшимча қилди Мирзо-Улуғбек Абдусаломов.

Таъкидланишича, сайловларда ўз-ўзини бошқариш органларининг вакиллари ҳам халқ назорати ўлароқ кузатувчи сифатида қатнашишига рухсат берилади. Маълумот учун, 2019 йилги сайловларда 20 миллиондан ортиқ сайловчи — шулардан 2 миллондан зиёд ёшлар илк бор — овоз беради. Сайловларда 16 мингдан зиёд сайлов округлари ва сайлов участкалари тузилиши режалаштирилган.