Ҳуқуқшунос Хушнуд Худойбердиев Олмазор тумани ҳокими ўринбосари Абдурасул Ваҳобов ва «Kun.uz» таҳририяти ходимлари ўртасидаги ҳодиса юзасидан Тошкент шаҳар прокуратураси чиқарган қарорга муносабат билдирди. Қуйида ҳуқуқшуноснинг муносабати билан тўлиқ танишиш мумкин.
«Замҳоким» ва журналистлар: воқеа аслида қандай бўлганди?
- «Kun.uz» мухбирлари бир тадбиркор мурожаатини ўрганиш учун Олмазор ҳокимлигига борганида ҳоким ўринбосари Абдурасул Ваҳобов мухбирларга қарата «ўзбекмисан» дея бақириб ташланиб қолган;
- Эртаси куни Тошкент шаҳар ҳокимлиги «замҳоким»нинг интервьюсини эълон қилди. У «Kun.uz» нашри мухбири олти ой аввал ундан 1 гектар ер олиб беришни сўрагани, эвазига катта пора ваъда қилгани, у эса рад жавобини берганини айтди. Олти ой ўтгач, мухбир яна ўша масалани кўтаргани учун, унга ташланганини маълум қилди;
- «Kun.uz» нашри баёнот билан чиқиб, бу гаплар туҳматлиги, мухбир Раҳматилла Исроилов туман ҳокими ўринбосари билан ҳаётда илк маротаба кўришиб тургани, илгари ҳеч қачон ўзаро кўришмагани билдириб, қолганини тегишли органлар ихтиёрига ҳавола қилганди;
- Журналист Раҳматилла Исроилов эса бош прокурор номига мурожаат йўллаб, «замҳоким» уни оғир жиноятни содир этиш (пора бериш)да айблаб, туҳмат қилганлиги, шу сабабли унга нисбатан чора кўришни сўраган эди;
- Бош прокуратура эса мазкур ҳолат юзасидан Тошкент шаҳар прокуратураси текшириш ўтказаётганлигини билдирган эди.
Прокуратуранинг қарори
Тошкент шаҳар прокуратураси ушбу ҳолатни ўрганиб, ҳоким ўринбосарига нисбатан жиноят ишини қўзғатишни рад қилиш ҳақида қарор қабул қилибди. Яъни, «замҳоким»нинг ҳокимият биносида журналистга ташланганлик ҳолатини жиноят эмас деб топган.Аслида ушбу қарор ҳуқуқий жиҳатдан нотўғри эмас. Яъни, ҳақиқатан ҳам видеолавҳага муҳрланган ҳаракат учун жиноий жавобгарликка тортиб бўлмайди. Журналистга ташланиб, камерани ўчиришни талаб қилиш учун Жиноят кодексида бирор жиноий жазо белгиланмаган. Бу иш учун балки нари борса майда безорилик учун маъмурий жавобгарликка тортиш мумкиндир. Жиноий ва маъмурий жавобгарлик ўртасида фарқ бор.Агар Тошкент шаҳар прокуратурасининг қарори ҳуқуқий жиҳатдан нотўғри бўлмаса, унда нега ижтимоий тармоқлар яна норозилик билдиряпти? Сабаби жуда оддий, чунки «замҳоким»нинг журналист пора таклиф қилгани ҳақида айтган гаплари бўйича ҳозирча ҳеч қандай изоҳ берилмаган. Қарорда ҳам бу ҳолат умуман эсланмаган.
Жамоатчилик ҳақли савол беряпти: «замҳоким» гаплари учун жавоб берсин, нега масаланинг бу қисмини унутиб қўйяпмиз?
Олмазор ҳокимлигининг кулгили хулосаси
Олмазор ҳокимлиги хизмат текшируви ўтказиб, Абдурасул Ваҳобовнинг ҳаракатларини касб этикаси ва хизмат лавозими мажбуриятларига тўлиқ риоя қилган, деб топибди. Бу ҳам кулгили, ҳам қайғули.Бизда саволлар бор:
- Нима учун замҳоким ҳаракатларини Олмазор ҳокимлигининг ўзи текширди?
- Масала жиддийлигини ҳисобга олиб, нега Тошкент шаҳар ҳокимлиги текшириб, хулоса бермади?
- Одоб-аҳлоқ қоидаларини бузганлиги кўрга ҳассадай кўриниб турган бир пайтда, ҳолатни ўрганишни Олмазор ҳокимлигига топшириш қайси мантиққа тўғри келади?
Ёки ҳокимларнинг касб этикаси учун журналистга ҳамла қилиш оддий ҳолатми?
Энди нима бўлади?
Тошкент шаҳар прокуратурасининг бу қарори якуний қарорми ёки туҳмат масаласи алоҳида яна кўриб чиқиладими, бунисидан хабарсизман. Лекин у масала кўрилиши шарт ва зарур! Бу ерда масала аниқ ва тиниқ:- пора таклиф қилгани рост бўлса, журналист жавобгарликка тортилсин, ахир бу коррупция!
- агар бу туҳмат бўлса, унда «замҳоким» жавобгарликка тортилсин, ахир бу муттаҳамлик!
Воқеалар ривожини кузатиб борамиз. Ишқилиб, «замҳоким»нинг ушбу қилмишига мутасаддилар ҳеч нарса бўлмагандай кўз юмиб, охирида жамоатчиликка қараб — «кўзни юмгил, кўзга айлансин кўнгил» демаса бўлди.
Хушнуд Худойбердиев, ҳуқуқшунос, блогер
Изоҳ (0)