Хоразмлик фуқаро «Шарқона лотто»нинг 2,5 млрд сўмлик рекорд жекпотини қўлга киритди

Хоразмлик Аҳмаджон Жуманиёзов Халқ банкининг «Шарқона лотто» лотереяси тарихидаги энг катта ютуқ — 2,5 миллиард сўмлик жекпот соҳиби бўлди.

Рекорд даражада катта жекпот «Шарқона лотто» лотереяси «36 дан 6» ўйинининг 2019 йил 18 сентябрдаги 134-ютуқлар тиражида ўйналган. Унда жекпот аслида 2,48 миллиард сўм қилиб белгиланган эди, дея хабар бермоқда Халқ банки.

«Бироқ жекпот соҳиби мазкур тиражда 6 та эмас, балки 10 та рақамни рўйхатдан ўтказгани учун жекпот билан бирга кейинги категориялар бўйича ҳам ютуқ суммаларига — жами 2,505 миллиард сўмга эга бўлди», — дейилади банк хабарида.

Қўшимча қилишларича, 2,5 миллиард сўмлик жекпот суммаси Халқ банки томонидан ютуқ эгасининг номига очилган пластик картага ўтказиб берилган ва ютуқ суммасидан ҳеч қандай солиқ ушлаб қолинмаган.

Реклама ҳуқуқи асосида