Умумтаълим мактабларида ёшларни ватанпарварлик руҳида тарбиялаш бўйича директор ўринбосари лавозими жорий этилади. Бу ҳақда «Дарё»га Марказий ҳарбий округ матбуот хизмати хабар берди.
Маълум қилинишича, Ўзбекистон Мудофаа вазирлиги ҳамда Халқ таълими вазирлиги томонидан истеъфодаги фахрий ҳарбийларни тарбиявий жараёнга жалб қилиш бўйича чора-тадбирлар режаси тасдиқланган.
Унга кўра, ноябрь ойига қадар умумтаълим муассасаларидаги чақирувга қадар тайёргарлик раҳбари лавозими ўрнига ёшларни ватанпарварлик руҳида тарбиялаш бўйича директор ўринбосари лавозими жорий этилади.
Шу билан бирга умумтаълим мактабларидаги чақирувга қадар бошланғич тайёргарлик фанидан машғулот ўтадиган мутахассислар (директор ўринбосари) таркибини Қуролли Кучлардан нафақага бўшатилган, ҳарбий кийим-бош кийиб юриш ҳуқуқига эга ҳамда ҳарбий соҳада юқори билимга эга 60 ёшга тўлмаган захирадаги офицер ва сержантлардан тайинланади.
Шунингдек, қўшма режада директор ўринбосарларининг малакасини ошириш тартиби, ҳарбий қисмда ҳамда умумтаълим мактабларида ҳарбий ватанпарварлик тадбирларини ўтказиш бўйича бир қатор вазифалар белгиланган.
Изоҳ (0)