Россиянинг «Татнефть» компанияси Тошкентдаги илк автомобилларга ёқилғи қуйиш шохобчаси (АЁҚШ)ни 20 сентябрь куни очди. «Gazeta.uz»нинг хабар беришича, шохобча Қоратош кўчасида, Самарқанд Дарвоза кўчаси билан чорраҳа яқинида жойлашган.
Очилиш маросимида сўзга чиққан Ўзбекистон энергетика вазири Алишер Султоновнинг таъкидлашича, бу «Татнефть»нинг Ўзбекистондаги биринчи, жаҳон бўйича эса иккинчи флагман АЁҚШидир. Бундан ташқари, Ўзбекистон АЁҚШларида биринчи бўлиб айнан шу ерда юқори октанли Аи-100 бензини сотилмоқда.
Станцияда, шунингдек, Аи-95, Аи-92, Аи-80 маркали бензин ва дизел ёқилғиси ҳам сотилади. Аввал хабар берилганидек, «Татнефть» Ўзбекистондаги АЁҚШлари учун ўзининг «Танеко» нефтни қайта ишлаш мажмуасида тайёрланган бензинни олиб кирмоқда.
Июль ойи ўрталарида «Татнефть» Ўртачирчиқ туманида АЁҚШ очганди. Компания Тошкент вилоятида 22 та АЁҚШдан иборат тармоқни ишга туширишни режалаштираётгани ҳақида хабарлар берилган эди.
Алишер Султонов Ўзбекистон «Татнефть» билан бошқа йўналишларда ҳам ҳамкорлик қилаётганини эслатиб ўтди.
«Биз улар билан Тошкентбўйи блокида геологик разведка ишларини бошлаяпмиз, Фарғона водийсида нефть қазиб олиш бўйича қўшма корхона, автошиналар, транспортёр тасмаларини ишлаб чиқариш бўйича қўшма корхона ташкил этяпмиз. Кенг миқёсда иш олиб боряпмиз ва ҳали қилинадиган ишлар кўп», — деди Ўзбекистон энергетика вазири.
Изоҳ (0)