Rossiyaning “Tatneft” kompaniyasi Toshkentdagi ilk avtomobillarga yoqilg‘i quyish shoxobchasi (AYoQSh)ni 20-sentabr kuni ochdi. “Gazeta.uz”ning xabar berishicha, shoxobcha Qoratosh ko‘chasida, Samarqand Darvoza ko‘chasi bilan chorraha yaqinida joylashgan.
Ochilish marosimida so‘zga chiqqan O‘zbekiston energetika vaziri Alisher Sultonovning ta’kidlashicha, bu “Tatneft”ning O‘zbekistondagi birinchi, jahon bo‘yicha esa ikkinchi flagman AYoQShidir. Bundan tashqari, O‘zbekiston AYoQShlarida birinchi bo‘lib aynan shu yerda yuqori oktanli Ai-100 benzini sotilmoqda.
Stansiyada, shuningdek, Ai-95, Ai-92, Ai-80 markali benzin va dizel yoqilg‘isi ham sotiladi. Avval xabar berilganidek, “Tatneft” O‘zbekistondagi AYoQShlari uchun o‘zining “Taneko” neftni qayta ishlash majmuasida tayyorlangan benzinni olib kirmoqda.
Iyul oyi o‘rtalarida “Tatneft” O‘rtachirchiq tumanida AYoQSh ochgandi. Kompaniya Toshkent viloyatida 22 ta AYoQShdan iborat tarmoqni ishga tushirishni rejalashtirayotgani haqida xabarlar berilgan edi.
Alisher Sultonov O‘zbekiston “Tatneft” bilan boshqa yo‘nalishlarda ham hamkorlik qilayotganini eslatib o‘tdi.
“Biz ular bilan Toshkentbo‘yi blokida geologik razvedka ishlarini boshlayapmiz, Farg‘ona vodiysida neft qazib olish bo‘yicha qo‘shma korxona, avtoshinalar, transportyor tasmalarini ishlab chiqarish bo‘yicha qo‘shma korxona tashkil etyapmiz. Keng miqyosda ish olib boryapmiz va hali qilinadigan ishlar ko‘p”, — dedi O‘zbekiston energetika vaziri.
Izoh (0)