Жиноят ишлари бўйича Касби туман судида миришкорлик 29 ёшли аёлни ўзини-ўзи ўлдириш даражасига етказишда айбланаётганлар Ш.Г. ҳамда С.Т. устидан суд иши бошлангани хусусида хабар берилганди.
Судья Маҳфират Очилова раислигида бўлиб ўтаётган суд мажлисига марҳума яшаган ҳудуд — «Янги Жейнов» МФЙ профилактика инспектори Мирзоҳид Қаноатов ҳам гувоҳ сифатида таклиф қилинди.
У билан суҳбатлашган судья Маҳфират Очилова воқеа жойига ўз вақтида етиб борган инспектор марҳума Ш.Р.ни осилган ҳолда топган бўлса, ИИБ тезкор гуруҳ ходимлари ва терговчиси келгунга қадар бўлган вақт оралиғида нега воқеа жойини қўриқламагани ва профилактика инспектори сифатида ҳеч қандай ҳаракат қилмагани сабаби билан қизиқди.
Мирзоҳид Қаноатов профилактика инспектори сифатида ўз вазифасини тўлақонли бажармагани боисини изоҳлади.
— Ўша пайт тушкунликка тушиб қолгандим, — дейди Мирзоҳид Қаноатов.
Суд мажлисида маълум қилинишича, воқеа жойига етиб борган ИИБ ходими Мирзоҳид Қаноатов воқеа ҳақида ИИБ тезкор гуруҳига хабар бергач, улар етиб келгунга қадар воқеа жойини қўриқламаган. Марҳума Ш.Р.нинг жасади эшикдан ўзбошимчалик билан ечиб олинишига йўл қўйиб берган.
— Бу эса мижозимнинг қизим аввал ўлдирилиб, кейин осиб қўйилган деган тахминига сабаб бўлмоқда, — дейди даъвогар Зокир Каримовнинг адвокати Нодиржон Мўминов. – ИИБ ходимининг биргина хатоси ва ўз вазифасини тўлақонли бажармагани шундай эътирозга сабаб бўлди.
Суд мажлисида қатнашган «Дарё» мухбирига кўра, профилактика инспектори терговга қадар суриштирув ишлари давомида айтган баъзи гапларидан тонган.
Айтилишича, маҳалла профилактика инспектори Мирзоҳид Қаноатов судда марҳума Ш.Р. ҳамда собиқ ИИБ ходими Зафар Аминов ўртасида бўлиб ўтган ва тасвирга олинган видеони умуман кўрмадим деган. Ҳолбуки, журналистик суриштирувлар давомида мухбир билан суҳбатда бўлган Мирзоҳид Қаноатов видео ҳақиқатдан ҳам борлиги, бироқ охиригача кўрмаганини айтганди.
Бундан ташқари, 1 апрель куни айбланувчи Ш.Г. томонидан воқеа жойига чақирилган ИИБ ходими марҳума Ш.Р.га айтган баъзи гапларидан ҳам тонган. Марҳума ИИБ ходими унга айтган гапларни ўлимидан аввал таниши, собиқ ИИБ ходими Зафар Аминовнинг телефонига «смс» тарзида жўнатган.
Маълум бўлишича, судда гувоҳ сифатида иштирок этган яна бир фуқаро — Муҳайё Гулназарова ҳам терговга қадар жараёнларда айтилган аксарият кўрсатмаларидан тониб, бошқа кўрсатма берган.
Эслатиб ўтамиз, судда айбланувчи сифатида иштирок этаётган Ш.Г. эҳтиёт чораси сифатида қамоққа олинган, 1 апрель воқеаларини тасвирга олган Т.С. эса гаров эвазига очиқда қолдирилган.
Изоҳ (0)