VpnMentor компаниясининг тадқиқотчилари Майамидаги ҳимояланмаган серверда Эквадор фуқаролари ҳақида жами 20,8 миллион қайдга эга маълумотлар базасини топди (Мамлакат аҳолисининг сони 16,6 миллионни ташкил этади). Бу ҳақда Meduza хабар бермоқда.
Қайдларда шахсни тасдиқловчи миллий рақамни англатувчи «cedula» қатори борлигини ҳисобга олган нашр тахминига кўра, 2019 йил учун ҳам янгиланган маълумотлар Эквадор ҳукумат реестридан ўғирланган.
У ердаги ахборотларда фуқароларнинг исми, жинси, туғилган санаси ва жойи, уй манзили, электрон почтаси, телефон рақамлари (уй, иш ва мобил), оилавий аҳволи, никоҳдан ўтган санаси, вафот этган санаси, таҳсил олганлик бўйича маълумоти қамраб олинган.
Бундан ташқари қайдларда қариндошлар ҳақида, жумладан 6,8 миллион 18 ёшга тўлмаган болалар (орасида 2019 йилда туғилган 187 нафар чақалоқ ҳақида) тўғрисидаги маълумотлар мавжуд. Айрим ёзувларга (7 миллион) Biess банкининг мижозлар ҳақидаги маълумотлари, шунингдек автомобили бор фуқаролар ҳақидаги қайдлар (2,5 миллион) қўшиб қўйилган.
Базада Эквадор президенти Ленин Морена ҳамда сиёсий бошпана сўраган WikiLeaks асосчиси Жулиан Ассанж (унга гувоҳнома расмийлаштирилган) ҳақидаги ахборотлар ҳам бор.
Тадқиқотчиларнинг фикрича маълумотларнинг манбаси Novaestrat компанияси бўлиши мумкин. VpnMentor мутахассислари фирма билан боғлана олмади, лекин Эквадор компьютер ҳужумлари мониторинги ва уларга қарши кураш маркази берилган хабардан кейин маълумотлар базасига кириш йўлини ёпиб қўйишга муваффақ бўлди.
Изоҳ (0)