Италия жанубида жойлашган Молизе округи ҳокимияти ҳудудда ўз бизнесини ташкил этиб ресторан, кафе ёки меҳмонхона юритадиган фуқароларга уч йил давомида ойига 700 евродан маблағ тўлашга тайёрлигини билдирди, деб ёзмоқда The Guardian.
Амалдорларнинг бундай қарорга келишига ҳудудда меҳнатга лаёқатли ёшларнинг камайиши, қарилик кўрсаткичининг ошиб кетиши сабаб бўлган. Охирги беш йил ичида Италиянинг қишлоқ хўжалигига ихтисослашган ушбу ҳудудини ўн мингга яқин аҳоли тарк этган. Айни вақтда округда 305 минг нафар одам истиқомат қилади. Бир неча қишлоқ ва шаҳарчалар ҳувиллаб ётибди ва аҳолининг асосий қисмини нафақахўр қариялар ташкил қилади.
Таклифга кўра, энг аввало икки мингдан кам аҳоли яшаб келаётган қишлоқларга эътибор қаратилади. Амалдорлар бу каби чора-тадбирларнинг ҳудудда аҳоли сонининг кўпайиши ва тадбиркорлик ривожланишига ёрдам беради деб ишонмоқда.
«Агар биз молиялаштиришни таклиф қилганимизда бу навбатдаги хайрия ҳаракатига айланган бўларди. Лекин биз кўпроғини кутяпмиз ва одамлар бу ерга инвестиция киритиши тарафдоримиз. Улар ҳар қандай бизнесни йўлга қўйишлари мумкин: нонвойхона, канцелярия маҳсулотлари дўкони, ресторан ва ҳ.к. Биз ушбу йўл билан шаҳарларга қайта ҳаёт бағишлаб аҳоли сонини оширишимиз мумкин», — дейди Молизе округи президенти Донато Тома.
Бошқа ҳудудлар ҳам Молизе ҳокимияти тутган йўлни маъқулламоқда.
Масалан, Сицилияда жойлашган Сутера коммунаси мэри янги аҳоли вакилларини жалб қилиш мақсадида бўшаб қолган уйларни муҳожирларга бериш ва кўчмас мулкни бир евродан пуллашни таклиф қилди.
Италия ёши катталар ва ёшлар тафовути бўйича дунёда иккинчи ўринда туради, мамлакатдаги ҳар бир ёшга 168,7 нафар 65 ёшдан катта бўлган кекса одам тўғри келади.
Дастурни амалга ошириш учун миллион евро атрофидаги маблағ сарф этилади.
Изоҳ (0)