Тошкентда мактаблар олдидаги йўл чизиқлари янгиланмоқда, янги йўл белгилари ўрнатилмоқда (фото)

Тошкент шаҳар ИИББ Йўл ҳаракати хавфсизлиги бошқармаси ва пойтахт ҳокимлиги ҳузуридаги Йўл ҳаракатини ташкил этиш маркази ходимлари томонидан янги ўқув йили олдидан мактаблар олдидаги йўл чизиқларини янгилаш ва тегишли йўл белгиларини ўрнатиш ишлари олиб борилмоқда.

Тошкент шаҳар ИИББдан хабар беришларича, бугунги кунга қадар 74, 283, 44, 229, 129, 62, 123, 183, 287-мактаблар олдидаги «Пиёдалар ўтиш жойи» йўл чизиқлари янгиланган, тезлик чекланганини билдирувчи ва «Диққат, болалар» йўл белгилари ўрнатилган.

«Ҳурматли ота-оналар! Фарзандларингизга йўлларни тўғри ва хавфсиз кесиб ўтишни ўргатишингизни сўраймиз. Йўл ҳаракати қоидаларига риоя этишда ўз фарзандларингизга намуна бўлинг», — дея қўшимча қилинган пойтахт ИИББ матбуот хизмати ахборотида.