Феликс, Азар, Гризманн. Ла Лигада янги мавсум бошланмоқда

Футбол бўйича Испания чемпионатининг янги мавсумига 16 август, жума куни старт берилади.

Европанинг кучли бешлик лигалари қатори Испания чемпионатида ҳам янги мавсум бошланмоқда. Дунёнинг энг кучли чемпионати номи учун Англия билан курашаётган Примера ўйинларининг ушбу мавсумида ҳам кураш «Барселона», «Реал» ва «Атлетико» жамоалари ўртасида кечиши кутилмоқда.

«Барселона»

Бир неча йилдан буён чемпионликни ҳеч кимга бермай келаётган «Барселона» мазкур трансфер ойнасида бир нечта катта харидларни амалга оширди. Жамоа Френки де Йонг, Антуан Гризманн, Хуниор Фирпо ва Нето каби футболчиларни трансфер қилди.

Жамоа ниҳоят Хорди Альбага ўринбосар топишга эришди. Энди испаниялик ҳимоячи жамоасининг ҳар бир ўйинида тушишга мажбур бўлмайди. Бироқ Фирпо аввалги футболчилардан фарқли ўлароқ асосий таркибга кира оладими? Мана шу масала сўроқ остида.

«Аякс»дан сотиб олинган таянч ярим ҳимоячиси Френки де Йонг ўтган мавсумда фантастик ҳаракат қилди. Энди ёш иқтидор эгаси Серхио Бускетс билан биргаликда янада ўсишга эришиши табиий. Антуан Гризманн эса ортиқча таърифга муҳтож эмас. Шунингдек, жамоа Неймарни ортга қайтариш устида бош қотирмоқда.

«Барселона»ни Яспер Силессен, Малком, Томас Вермален, Адре Гомеш ва бошқа бир қатор футболчилар тарк этди. Шунингдек, каталонлар яна бир нечта ярим ҳимоячи борасидаги таклифларни кўриб чиқишга тайёр экани бот-бот хабар қилинмоқда. Хусусан, Филиппе Коутиньо ва Иван Ракитич каби футболчилар сентябрга қадар бошқа жамоага йўл олиши мумкин.

«Кўк-анорранглилар» устози Эрнесто Вальверде жамоанинг бу йилги мақсади Ла Лига чемпионлигини ҳимоя қилишдан иборат эканини таъкидлади. Бироқ бу сафар каталонларга осон бўлмаслиги аниқ. Нега деган саволга кейинроқ яна тўхталамиз.

«Реал Мадрид»

Муваффақиятсиз мавсумдан кейин ёзда бир қатор ўзгаришлар қилган мадридликлар ўз ўйинини топиб олса, бу сафар «Барселона»га муносиб рақобатчи бўлиши мумкин. Ўтган мавсум якунида жамоа президенти Флорентино Перес қатор ваъдалар берган ҳолда Зинедин Зиданни мураббийликка қайтарди.

Ёзги трансфер ойнасида «Реал» Эден Азар, Лука Йович, Эдер Милитао, Ферлан Менди, шунингдек, ёш иқтидор эгалари Родриго Гоэс ва Такефуса Куболарни ўз сафига қўшиб олди. Жамоани эса Хесус Вальехо, Серхио Регилон, Дани Себальос, Марко Льоренте, Тео Эрнандес, Матео Ковачич, Боха Майораль каби футболчилар тарк этди.

Азарни сотиб олиш орқали «Реал» ҳужумдаги муаммоларни деярли ёпишга ҳаракат қилади. Бироқ қолган футболчилар анча ёшлиги ва бошқа чемпионатлардан олиб келинганини инобатга олса, Зидан ўйинни барқарорлаштириш учун анча тер тўкишига тўғри келади. Франциялик мутахассис Пол Погбани ҳам олиб келишни истаганди ва бу трансфернинг амалга ошиши чўзилавергач, ОАВда турли хил хабарлар янграшига сабаб бўлмоқда. Баъзи нашрлар Зидан жамоани тарк этиш ниятида эканини ёзса, айримлари мутахассис Бэйл ва Йовични режасига киритмаётганини айтмоқда.

«Реал» ҳозирда трансфер бозорида фаолликни пасайтирмади. «Қаймоқранглилар» Погба ёки Неймарни ўз сафига қўшиб олиши катта эҳтимол. Вазиятга эътибор қилинса, ҳозирда «Реал»га бразилиялик футболчидан кўра «Манчестер Юнайтед» етакчисининг фойдаси кўпроқ тегадигандек. Бироқ трансфер ойнаси ёпилгунга қадар бирор нима дейиш қийин. Балки мадридликлар раҳбарияти дастлабки турлардаги ўйинлардан хулоса қилган ҳолда камчиликларни бартараф этиш ҳақида ўйлаётгандир...

«Атлетико Мадрид»

«Матрасчилар» мавсумлар оралиғида ҳайрон қоларли ўзгаришларга қўл урди. Дастлаб жамоани Диего Годин, Хуанфран, Филиппе Луис, Лукас Эрнандес, Родри ва Антуан Гризманн каби етакчилар тарк этди. Бироқ уларнинг ўрнига Киран Триппьер, Маркос Льоренте, Жоау Феликс, Иван Шапонич ва Ренан Лоди каби янги номлар олиб келинди. Бундан ташқари, мадридликлар «Валенсия» етакчиси Родригони қўлга киритишга яқин турибди.

Бир қарашда янги номлар билан сафини кенгайтириб олган жамоага ўйин амалиёти керакдек кўринаётганди, бироқ мавсумолди ўртоқлик учрашувлари бунинг аксини кўрсатди. Симеоне бошчилигидаги жамоа сермаҳсулликда ҳам ёмон кўринмади. Бироқ бу расмий ўйинларда ҳам бардавом бўлиш ёки бўлмаслигини кейин билиб оламиз.

1-тур учрашувлари ҳақида

Мавсумни амалдаги чемпион иштирокидаги ўйин билан бошланади. «Барселона» Билбаога сафар қилади ва «Атлетик» билан ўйнайди. Мазкур баҳсни каталонлар сардори Лионель Месси ўтказиб юборади.

«Реал» эса меҳмонда «Сельта» билан ўйнайди. Мадридлкилар учун Виго сафар доим оғир ўтган, бунинг устига илк турдаёқ ноқулай рақибнинг дуч келиши Зидан жамоаси учун ҳақиқий синов бўлади. Катта эҳтимол билан учрашувни жароҳат олгани айтилаётган Эден Азар ўтказиб юборади.

Турнинг қизиқарли ўйинларидан бири «Валенсия» ва «Реал Сосьедад» жамоалари ўртасида кечади. Ўтган мавсум якунини кўтаринки руҳда ўтказган «Валенсия» юқоридаги «кучли учлик»ка қаршилик қила оладиган саноқли жамоалардан бири ҳисобланади.

«Бетис» ўзида «Вальядолид»га қарши баҳс юритади. «Севилья» эса Каталонияда «Эспаньол» билан ўйнайди. «Атлетико» Мадридда ўтган мавсум кашфиётига айланган «Хетафе»ни қабул қилади. Асосий эътиборни ҳимояга қаратадиган мазкур жамоалар ўртасидаги баҳс ҳам қизиқарли ўтиши кутилмоқда.

Нодирхон Ҳамидхонов тайёрлади.