Feliks, Azar, Grizmann. La Ligada yangi mavsum boshlanmoqda

Futbol bo‘yicha Ispaniya chempionatining yangi mavsumiga 16-avgust, juma kuni start beriladi.

Yevropaning kuchli beshlik ligalari qatori Ispaniya chempionatida ham yangi mavsum boshlanmoqda. Dunyoning eng kuchli chempionati nomi uchun Angliya bilan kurashayotgan Primera o‘yinlarining ushbu mavsumida ham kurash “Barselona”, “Real” va “Atletiko” jamoalari o‘rtasida kechishi kutilmoqda.

“Barselona”

Bir necha yildan buyon chempionlikni hech kimga bermay kelayotgan “Barselona” mazkur transfer oynasida bir nechta katta xaridlarni amalga oshirdi. Jamoa Frenki de Yong, Antuan Grizmann, Xunior Firpo va Neto kabi futbolchilarni transfer qildi.

Jamoa nihoyat Xordi Albaga o‘rinbosar topishga erishdi. Endi ispaniyalik himoyachi jamoasining har bir o‘yinida tushishga majbur bo‘lmaydi. Biroq Firpo avvalgi futbolchilardan farqli o‘laroq asosiy tarkibga kira oladimi? Mana shu masala so‘roq ostida.

“Ayaks”dan sotib olingan tayanch yarim himoyachisi Frenki de Yong o‘tgan mavsumda fantastik harakat qildi. Endi yosh iqtidor egasi Serxio Buskets bilan birgalikda yanada o‘sishga erishishi tabiiy. Antuan Grizmann esa ortiqcha ta’rifga muhtoj emas. Shuningdek, jamoa Neymarni ortga qaytarish ustida bosh qotirmoqda.

“Barselona”ni Yasper Silessen, Malkom, Tomas Vermalen, Adre Gomesh va boshqa bir qator futbolchilar tark etdi. Shuningdek, katalonlar yana bir nechta yarim himoyachi borasidagi takliflarni ko‘rib chiqishga tayyor ekani bot-bot xabar qilinmoqda. Xususan, Filippe Koutinyo va Ivan Rakitich kabi futbolchilar sentabrga qadar boshqa jamoaga yo‘l olishi mumkin.

“Ko‘k-anorranglilar” ustozi Ernesto Valverde jamoaning bu yilgi maqsadi La Liga chempionligini himoya qilishdan iborat ekanini ta’kidladi. Biroq bu safar katalonlarga oson bo‘lmasligi aniq. Nega degan savolga keyinroq yana to‘xtalamiz.

“Real Madrid”

Muvaffaqiyatsiz mavsumdan keyin yozda bir qator o‘zgarishlar qilgan madridliklar o‘z o‘yinini topib olsa, bu safar “Barselona”ga munosib raqobatchi bo‘lishi mumkin. O‘tgan mavsum yakunida jamoa prezidenti Florentino Peres qator va’dalar bergan holda Zinedin Zidanni murabbiylikka qaytardi.

Yozgi transfer oynasida “Real” Eden Azar, Luka Yovich, Eder Militao, Ferlan Mendi, shuningdek, yosh iqtidor egalari Rodrigo Goes va Takefusa Kubolarni o‘z safiga qo‘shib oldi. Jamoani esa Xesus Valyexo, Serxio Regilon, Dani Sebalyos, Marko Lyorente, Teo Ernandes, Mateo Kovachich, Boxa Mayoral kabi futbolchilar tark etdi.

Azarni sotib olish orqali “Real” hujumdagi muammolarni deyarli yopishga harakat qiladi. Biroq qolgan futbolchilar ancha yoshligi va boshqa chempionatlardan olib kelinganini inobatga olsa, Zidan o‘yinni barqarorlashtirish uchun ancha ter to‘kishiga to‘g‘ri keladi. Fransiyalik mutaxassis Pol Pogbani ham olib kelishni istagandi va bu transferning amalga oshishi cho‘zilavergach, OAVda turli xil xabarlar yangrashiga sabab bo‘lmoqda. Ba’zi nashrlar Zidan jamoani tark etish niyatida ekanini yozsa, ayrimlari mutaxassis Beyl va Yovichni rejasiga kiritmayotganini aytmoqda.

“Real” hozirda transfer bozorida faollikni pasaytirmadi. “Qaymoqranglilar” Pogba yoki Neymarni o‘z safiga qo‘shib olishi katta ehtimol. Vaziyatga e’tibor qilinsa, hozirda “Real”ga braziliyalik futbolchidan ko‘ra “Manchester Yunayted” yetakchisining foydasi ko‘proq tegadigandek. Biroq transfer oynasi yopilgunga qadar biror nima deyish qiyin. Balki madridliklar rahbariyati dastlabki turlardagi o‘yinlardan xulosa qilgan holda kamchiliklarni bartaraf etish haqida o‘ylayotgandir...

“Atletiko Madrid”

“Matraschilar” mavsumlar oralig‘ida hayron qolarli o‘zgarishlarga qo‘l urdi. Dastlab jamoani Diyego Godin, Xuanfran, Filippe Luis, Lukas Ernandes, Rodri va Antuan Grizmann kabi yetakchilar tark etdi. Biroq ularning o‘rniga Kiran Trippyer, Markos Lyorente, Joau Feliks, Ivan Shaponich va Renan Lodi kabi yangi nomlar olib kelindi. Bundan tashqari, madridliklar “Valensiya” yetakchisi Rodrigoni qo‘lga kiritishga yaqin turibdi.

Bir qarashda yangi nomlar bilan safini kengaytirib olgan jamoaga o‘yin amaliyoti kerakdek ko‘rinayotgandi, biroq mavsumoldi o‘rtoqlik uchrashuvlari buning aksini ko‘rsatdi. Simeone boshchiligidagi jamoa sermahsullikda ham yomon ko‘rinmadi. Biroq bu rasmiy o‘yinlarda ham bardavom bo‘lish yoki bo‘lmasligini keyin bilib olamiz.

1-tur uchrashuvlari haqida

Mavsumni amaldagi chempion ishtirokidagi o‘yin bilan boshlanadi. “Barselona” Bilbaoga safar qiladi va “Atletik” bilan o‘ynaydi. Mazkur bahsni katalonlar sardori Lionel Messi o‘tkazib yuboradi.

“Real” esa mehmonda “Selta” bilan o‘ynaydi. Madridlkilar uchun Vigo safar doim og‘ir o‘tgan, buning ustiga ilk turdayoq noqulay raqibning duch kelishi Zidan jamoasi uchun haqiqiy sinov bo‘ladi. Katta ehtimol bilan uchrashuvni jarohat olgani aytilayotgan Eden Azar o‘tkazib yuboradi.

Turning qiziqarli o‘yinlaridan biri “Valensiya” va “Real Sosyedad” jamoalari o‘rtasida kechadi. O‘tgan mavsum yakunini ko‘tarinki ruhda o‘tkazgan “Valensiya” yuqoridagi “kuchli uchlik”ka qarshilik qila oladigan sanoqli jamoalardan biri hisoblanadi.

“Betis” o‘zida “Valyadolid”ga qarshi bahs yuritadi. “Sevilya” esa Kataloniyada “Espanyol” bilan o‘ynaydi. “Atletiko” Madridda o‘tgan mavsum kashfiyotiga aylangan “Xetafe”ni qabul qiladi. Asosiy e’tiborni himoyaga qaratadigan mazkur jamoalar o‘rtasidagi bahs ham qiziqarli o‘tishi kutilmoqda.

Nodirxon Hamidxonov tayyorladi.