Бешинчи халқаро армия ўйинларининг диққат марказида турган «Танк биатлони» мусобақаси борган сари қизғин тус олмоқда. 6 август куни иккинчи экипаж аъзолари ўз маҳоратларини синовдан ўтказди. Бу ҳақда Мудофаа вазирлиги Ахборот ва оммавий коммуникациялар департаменти «Дарё»га маълум қилди.
Мазкур босқичда Т-72 Б-3 танкини бошқариш, тўсиқлардан ўтиш, белгиланган нишонларни яксон қилиш ва имкон қадар қисқа муддатда финиш чизиғига етиб келиш вазифаси юклатилди. Бу гал катта лейтенант Муҳиддин Нуриддинов бошчилигидаги экипаж аъзолари муносиб иштирок этди.
Таъкидлаш керакки, ўзбекистонлик ҳарбий хизматчилар тарихда илк бор «Танк биатлони» мусобақасида иштирок этмоқда.
Бугунги баҳсда ўзбекистонлик ҳарбийлар олдинги жамоага нисбатан анча яхши натижа кўрсатди. Сарфланган вақт ва йўналиш бўйлаб ҳаракатланиш, тўсиқларни забт этиш борасидаги натижалар қувонарли. Умумий ҳисобда экипаж механик ҳайдовчиси кичик сержант Авазбек Мустафоқулов Т-72 Б-3 танкини 73 км/соат тезлик билан ҳар бир тўсиқдан беталафот олиб ўтиб, томошабинлар эътиборига сазовор бўлди.
Катта лейтенант Муҳиддин Нуриддинов бошчилигидаги экипаж аввалги экипажга нисбатан 1,30 дақиқа тезроқ фарқ билан финиш чизиғига етиб келди. Қувонарлиси ушбу беллашувда ҳам Ўзбекистон жамоаси умумжамоа ҳисобида ҳамон биринчиликни қўлдан бой бергани йўқ.
Изоҳ (0)