Beshinchi xalqaro armiya o‘yinlarining diqqat markazida turgan “Tank biatloni” musobaqasi borgan sari qizg‘in tus olmoqda. 6-avgust kuni ikkinchi ekipaj a’zolari o‘z mahoratlarini sinovdan o‘tkazdi. Bu haqda Mudofaa vazirligi Axborot va ommaviy kommunikatsiyalar departamenti “Daryo”ga ma’lum qildi.
Mazkur bosqichda T-72 B-3 tankini boshqarish, to‘siqlardan o‘tish, belgilangan nishonlarni yakson qilish va imkon qadar qisqa muddatda finish chizig‘iga yetib kelish vazifasi yuklatildi. Bu gal katta leytenant Muhiddin Nuriddinov boshchiligidagi ekipaj a’zolari munosib ishtirok etdi.
Ta’kidlash kerakki, o‘zbekistonlik harbiy xizmatchilar tarixda ilk bor “Tank biatloni” musobaqasida ishtirok etmoqda.
Bugungi bahsda o‘zbekistonlik harbiylar oldingi jamoaga nisbatan ancha yaxshi natija ko‘rsatdi. Sarflangan vaqt va yo‘nalish bo‘ylab harakatlanish, to‘siqlarni zabt etish borasidagi natijalar quvonarli. Umumiy hisobda ekipaj mexanik haydovchisi kichik serjant Avazbek Mustafoqulov T-72 B-3 tankini 73 km/soat tezlik bilan har bir to‘siqdan betalafot olib o‘tib, tomoshabinlar e’tiboriga sazovor bo‘ldi.
Katta leytenant Muhiddin Nuriddinov boshchiligidagi ekipaj avvalgi ekipajga nisbatan 1,30 daqiqa tezroq farq bilan finish chizig‘iga yetib keldi. Quvonarlisi ushbu bellashuvda ham O‘zbekiston jamoasi umumjamoa hisobida hamon birinchilikni qo‘ldan boy bergani yo‘q.
Izoh (0)