2019 йилнинг 6 август куни Ўзбекистон ва Туркия ташқи сиёсат идоралари раҳбарлари ҳамраислигидаги Қўшма стратегияни режалаштириш гуруҳининг биринчи йиғилишида ҳамда Туркия элчиларининг XI йиллик конференциясида иштирок этиш учун Анқара шаҳрига келган Ўзбекистон ташқи ишлар вазири Абдулазиз Комилов Туркия президенти Ражаб Тоййиб Эрдўғон томонидан қабул қилинди. Бу ҳақда Ташқи ишлар вазириги хабар берди.
Вазир Ўзбекистон раҳбарининг Туркия президенти ва биродар халқига йўллаган илиқ саломини ва энг эзгу тилакларини етказди.
Ражаб Тоййиб Эрдўғон ўз навбатида Ўзбекистон ва Туркия ўртасидаги икки томонлама стратегик шериклик муносабатларининг ҳозирги ҳолати ва истиқболларини юқори баҳолади, икки давлат ўртасидаги муносабатларни сифат жиҳатдан янги даражага олиб чиқиш жараёнидаги Президент Шавкат Мирзиёев ташаббусларининг муҳим ролини эътироф этди.
Суҳбат чоғида олий даражадаги учрашувлар ҳамда Савдо-иқтисодий ҳамкорлик бўйича ҳукуматлараро аралаш комиссия ва Қўшма стратегияни режалаштириш гуруҳининг йиғилишлари натижасида эришилган келишувларни амалга ошириш жараёни юзасидан фикр алмашилди, икки томон кун тартибининг бошқа жиҳатлари, хусусан асосий қўшма тадбирларнинг жадвали кўриб чиқилди.
Жорий йилда Анқара шаҳрида Ўзбекистон ва Туркия раҳбарлари раислигида ўтказилиши режалаштирилаётган Олий даражадаги Ўзбекистон—Туркия стратегик ҳамкорлик кенгашининг биринчи йиғилишига тайёргарлик жараёнига алоҳида эътибор қаратилди.
Олий даражадаги мунтазам Ўзбекистон— Туркия мулоқоти, икки давлат раҳбарларининг саъй-ҳаракатлар билан шаклланган ишонч, ўзаро ҳурмат ва бир-бирининг манфаатларини ҳисобга олиш муҳити давлатлараро ҳамкорликни янада кенгайтириш учун мустаҳкам асос ҳисобланиши қайд этилди.
Изоҳ (0)