Ўзбекистон Қуролли Кучлари академиясида мудофаа вазирининг ўринбосари генерал майор Азизбек Икрамов Европада хавфсизлик ва ҳамкорлик ташкилотининг мамлакатимиздаги лойиҳалари мувофиқлаштирувчиси, элчи Жон Макгрегор билан учрашди. Бу ҳақда Мудофаа вазирлиги Ахборот ва оммавий коммуникациялар департаменти «Дарё»га маълум қилди.
Тадбирда икки томонлама ўзаро манфаатли ҳамкорликнинг бугунги ҳолати муҳокама қилиниб, уни жадаллаштириш борасида фикрлар алмашинди. Учрашув давомида Қуролли Кучлари академияси ҳамда Европада хавфсизлик ва ҳамкорлик ташкилоти ўртасида тадбирлар режаси имзоланди.
«Икки йилга мўлжалланган ушбу лойиҳа асосан ҳарбий таълимга йўналган. Белгиланган муддат ичида ўзбекистонлик курсантлар хориж тажрибаси билан таништирилиб борилади. Жорий йилнинг октябр ойида минтақавий хавфсизликка бағишланган йирик халқаро анжуман, декабрда эса киберхавфсизлик мавзусида тренинг машғулоти ўтказиш режалаштирилган», – деди элчи Жон Макгрегор.
Меҳмонлар, шунингдек, Қуролли Кучлари академияси фаолияти, музейи билан танишди.
Изоҳ (0)