Марказий ҳарбий округига қарашли Навоий гарнизонида 23—24 июнь кунлари илк маротаба Қуролли Кучлар куч тузилмалари билан ҳамкорликда тунги машғулотлар ўтказилди. Бу ҳақда Марказий ҳарбий округ матбуот хизмати маълум қилди.
Марказий ҳарбий округ қўшинлари қўмондони полковник Ойбек Саидов раҳбарлигида ўтказилган тунги амалий машғулотларда Навоий шаҳри хавфсизлиги учун масъул вазирликларнинг махсус ва тезкор бўлинмалар жалб этилган.
Дастлаб ДХХ ва Ички ишлар вазирлиги тезкор бўлинмаси томонидан кечки соат 20:15 да ноқонуний қуролланган кичик гуруҳ Навоий шаҳри марказий кўчаларидан Беруний кўчасига томон енгил машинада ҳаракатланиб, «Керан зит» ишлаб чиқариш заводи биносига жойлашгани маълум қилинди. Шу билан бирга қуролли кимсалар қайси чегара ҳудудидан ўтганлиги, шахси ва тайёргарлиги ҳақида тезкор маълумотлар аниқланиб, бинога хавфсиз кириш йўллари разведка қилинган.
Тез фурсатда Мудофаа, ИИВ ва Миллий гвардия таркибидан йиғма махсус отряд тузилиб, улар 3 гуруҳга бўлиниб ҳаракатланиши келишилган. Сўнг «Тигр» номли енгил зирҳланган техникалар, замонавий қуроллар, мўлжал кўрсатувчи лазер, тепловизор воситаси (яъни инсон танасидан чиқаётган иссиқликка қараб, бинода қанча одам жойлашганини кўрсатувчи мослама), ҳар бир ҳарбий хизматчи ҳаракатини онлайн тарзда узатиб турадиган мослама, қуролларга ўрнатилган махсус тунги оптик асбоблар тайёр ҳолатга келтирилган.
Махсус йиғма отряд таъқиб қилинаётган гуруҳга дастлаб келишув йўли таклиф қилинди. Рад этилгач, «Кобра» усулида штурм қилиниши бўйича кўрсатма берилган. Яъни бинонинг тепа қисмидан махсус учлик ҳамда ён ва пастки қисмидан қуршовга олиш гуруҳи ҳаракатланиб, қидирувда бўлган шахслар ўртада қўлга олинган. Қўмондонлик томонидан ушбу махсус операцияни кузатиш учун бино яқинида махсус жой жиҳозланган.
24 июнь куни Марказий ҳарбий округ қўмондони томонидан кучишлатар тузилмалар раҳбарлари билан тунги машғулот якуни ўтказилган. Йўл қўйилган камчиликлар ва ютуқлар эътироф этилган.
Изоҳ (0)