«Azon.uz» портали «Расулуллоҳ соллаллоҳу алайҳи ва салламнинг буюкликларидаги сирлардан лавҳалар» китобида Муҳаммад пайғамбар (с.а.в.)нинг ташқи кўринишларидаги мукаммаллик ҳақида келтирилган мисоллар билан бўлишди.
Саҳобалар Пайғамбар соллаллоҳу алайҳи ва салламни шу даражада васфлаганларки, гўё сиз У зотни кўриб тургандай бўласиз. У зотнинг юзлари, яноқлари, икки кўзлари, қовоқлари, бурунлари, бўйинлари, бошлари, пешаналари, оғизлари, тишлари, икки елкалари, икки кафтлари, икки оёқлари ва бошқа аъзолари қандай бўлганини ўта аниқлик билан баён этишган.
Бунга мисол қилиб Баро розияллоҳу анҳунинг сўзларини келтиришимиз мумкин: «Расулуллоҳ соллаллоҳу алайҳи ва саллам икки елкаларининг ораси кенг, сочлари икки қулоқларининг юмшоқ жойигача етадиган зот эдилар. Мен У зотдан гўзал кишини кўрмаганман».
Яна шундай дейди: «Расулуллоҳ соллаллоҳу алайҳи ва саллам инсонлар орасида юзлари энг чиройли, ташқи кўринишлари энг гўзал киши эдилар. Ҳаддан ортиқ баланд ҳам, паст ҳам эмас эдилар».
Али розияллоҳу анҳу айтади: «Расулуллоҳ соллаллоҳу алайҳи ва саллам семиз ҳам, яноқлари гўштли ҳам эмас, юзлари қисман доира шаклида эди». Абу Туфайлга: «Бизга Расулуллоҳ соллаллоҳу алайҳи ва саллам қандай бўлганларини васфлаб беринг!» дейишди. Шунда у: «Расулуллоҳ соллаллоҳу алайҳи ва саллам юзлари оқ ва гўзал эди», деб жавоб берди.
Қоши кўзи келишган соҳиби жамол,
Эрур ахлоқи Қуръон соҳиби камол.
Расулуллоҳ соллаллоҳу алайҳи ва салламнинг кўзлари кенг, қовоқлари атрофидаги киприклар узун, қирғийбурун, яъни бурун учи билан бирга юқори тарафи кўтарилган эди.
Пешаналари кенг, бошлари озгина катта, юзлари нурли, сочлари қоп-қора, оғизлари катта (араблар шу каби оғизларни мақтайдилар), тишлари оппоқ (тишлари бир текисда, икки тиш орасидаги масофа бир хил), оғизларидан хушбўйлик таралиб турар, қошлари узун ва ингичка, иккиси бир-бирига уланмаган эди.
Расулуллоҳ соллаллоҳу алайҳи ва салламнинг бу гўзалликлари қаёқда-ю, У зот жирканч кўринишда тасвирланган суратлар қаёқда! Шунинг ўзи бу расмларни чизган кимсалар улуғ Пайғамбар соллаллоҳу алайҳи ва салламни танимаслиги ва билмаслигига далолат қилади!
Анас розияллоҳу анҳудан ривоят қилинади: «Расулуллоҳ соллаллоҳу алайҳи ва салламнинг кафтларидан кўра мулойим ипакни ҳам, дебожни ҳам ушламаганман, Расулуллоҳ соллаллоҳу алайҳи ва салламнинг бўйларидан кўра хушбўй мушкни ҳам, анбарни ҳам ҳидламаганман».
Пайғамбар соллаллоҳу алайҳи ва салламни кўрган киши хаёлида ёлғончи инсоннинг олдида эмас, ростгўй инсоннинг олдида турибман деган фикрга борар эди. Яҳудийларнинг энг катта олими бўлган Абдуллоҳ ибн Салом шундай дейди: «Пайғамбар соллаллоҳу алайҳи ва саллам Мадинага келганларида У зотни кўриш учун бордим. Юзларига қараб, бу юз ёлғончи кимсанинг юзи эмаслигига амин бўлдим.
Гарчи бўлмаса ҳам баён этгувчи белгилар,
Ул зотнинг кўриниши берар хабарлар.
Пайғамбар соллаллоҳу алайҳи ва саллам ҳайбатли ва виқорли эдилар. Ул зотнинг амакиваччалари Али ибн Абу Толиб розияллоҳу анҳу айтадилар: «Ким Пайғамбар соллаллоҳу алайҳи ва салламни биринчи бор кўрса, У зотнинг ҳайбатларидан қўрқар эди».
Амр ибн Осс розияллоҳу анҳу айтади: «Мен учун Расулуллоҳ соллаллоҳу алайҳи ва салламдан кўра ҳам суюкли, ҳам ҳурматли инсон бўлмаган. У зотни ҳурмат қилганимдан кўзларим билан тўйиб қарай олмасдим. Бирор киши У зотни қандай эканликларини менга васфлаб беринг деса, бу қўлимдан келмайди. Чунки мен У зотга кўзларим билан тўйиб қарай олмаганман».
Пайғамбар соллаллоҳу алайҳи ва саллам поклик ва тозаликни яхши кўрар эдилар. Танаси, кийимлари ва сочининг тозалигига эътибор бермаган кишини ёқтирмас эдилар. У зот: «Аллоҳ таоло гўзал зот ва гўзалликни яхши кўради», деб марҳамат қилганлар.
Жобир ибн Абдуллоҳ розияллоҳу анҳудан ривоят қилинади: «Расулуллоҳ соллаллоҳу алайҳи ва саллам бизнинг олдимизга келдилар ва сочлари тўзиган бир кишини кўриб қолдилар. Шунда: «Бу киши сочларини тартибга солиб қўядиган нарса топа олмадими?» дедилар. Кийимлари кир бўлган бошқа бир кишини кўриб: «Бу киши кийимларини ювиш учун сув топа олмадими?» дедилар».
Баро ибн Озиб розияллоҳу анҳу айтади: «Расулуллоҳ соллаллоҳу алайҳи ва саллам қизил ҳулла кийганларини кўрдим. У зотдан кўра гўзал кишини кўрмаганман».
Юқоридаги маълумотлар мусулмонлар ўз пайғамбарларининг ташқи кўринишлари борасида келтирган ривоятларининг баъзилари эди, холос. Аслини олганда У зот бундан бир неча чандон олий эдилар. Пайғамбар соллаллоҳу алайҳи ва салламнинг ахлоқлари ва шамойилларига боғлиқ китоблардан биттасининг мундарижасига қарасангиз, ровийлар У зот ҳақларида бирор маълумотни қолдирмай ривоят қилганларига гувоҳ бўласиз. Умуман олганда, бу фақат биргина пайғамбарнинг ҳаётида учрайди. У ҳам бўлса Муҳаммад соллаллоҳу алайҳи ва саллам. Нима учун? Чунки У зот пайғамбарларнинг хотамидир. Инсонлар У зот ҳақида барча нарсани билишлари лозим. Ана шунда У зот барча ҳолатларда инсонлар эргашадиган намуна бўладилар.
Изоҳ (0)