Navoiy garnizonida kuchishlatar bo‘linmalar hamkorligida birinchi marta tungi maxsus mashg‘ulotlar o‘tkazildi (foto+video)
Markaziy harbiy okrugga qarashli Navoiy garnizonida 23—24-iyun kunlari ilk marotaba Qurolli Kuchlar kuch tuzilmalari bilan hamkorlikda tungi mashg‘ulotlar o‘tkazildi. Bu haqda Markaziy harbiy okrug matbuot xizmati ma’lum qildi.
Markaziy harbiy okrug qo‘shinlari qo‘mondoni polkovnik Oybek Saidov rahbarligida o‘tkazilgan tungi amaliy mashg‘ulotlarda Navoiy shahri xavfsizligi uchun mas’ul vazirliklarning maxsus va tezkor bo‘linmalar jalb etilgan.
Dastlab DXX va Ichki ishlar vazirligi tezkor bo‘linmasi tomonidan kechki soat 20:15 da noqonuniy qurollangan kichik guruh Navoiy shahri markaziy ko‘chalaridan Beruniy ko‘chasiga tomon yengil mashinada harakatlanib, “Keran zit” ishlab chiqarish zavodi binosiga joylashgani ma’lum qilindi. Shu bilan birga qurolli kimsalar qaysi chegara hududidan o‘tganligi, shaxsi va tayyorgarligi haqida tezkor ma’lumotlar aniqlanib, binoga xavfsiz kirish yo‘llari razvedka qilingan.
Tez fursatda Mudofaa, IIV va Milliy gvardiya tarkibidan yig‘ma maxsus otryad tuzilib, ular 3 guruhga bo‘linib harakatlanishi kelishilgan. So‘ng “Tigr” nomli yengil zirhlangan texnikalar, zamonaviy qurollar, mo‘ljal ko‘rsatuvchi lazer, teplovizor vositasi (ya’ni inson tanasidan chiqayotgan issiqlikka qarab, binoda qancha odam joylashganini ko‘rsatuvchi moslama), har bir harbiy xizmatchi harakatini onlayn tarzda uzatib turadigan moslama, qurollarga o‘rnatilgan maxsus tungi optik asboblar tayyor holatga keltirilgan.
Maxsus yig‘ma otryad ta’qib qilinayotgan guruhga dastlab kelishuv yo‘li taklif qilindi. Rad etilgach, “Kobra” usulida shturm qilinishi bo‘yicha ko‘rsatma berilgan. Ya’ni binoning tepa qismidan maxsus uchlik hamda yon va pastki qismidan qurshovga olish guruhi harakatlanib, qidiruvda bo‘lgan shaxslar o‘rtada qo‘lga olingan. Qo‘mondonlik tomonidan ushbu maxsus operatsiyani kuzatish uchun bino yaqinida maxsus joy jihozlangan.
24-iyun kuni Markaziy harbiy okrug qo‘mondoni tomonidan kuchishlatar tuzilmalar rahbarlari bilan tungi mashg‘ulot yakuni o‘tkazilgan. Yo‘l qo‘yilgan kamchiliklar va yutuqlar e’tirof etilgan.
