Ҳукумат қарори билан Астрахань давлат техника университетининг (Россия) Тошкент вилоятидаги филиали ташкил этилди. Бу ҳақда «Ҳуқуқий ахборот» канали маълум қилди.
Қарорга мувофиқ, балиқчилик тармоғи эҳтиёжларини қондириш учун ишлаб чиқариш ва энг муҳим илмий-тадқиқот вазифаларини ҳал этишга қодир бўлган юқори малакали кадрларни халқаро таълим стандартлари даражасида тайёрлаш филиалнинг асосий вазифаси ҳисобланади.
Филиал Бош муассаса томонидан таъсис этилади ва кадрларга бўлган талабдан келиб чиқиб асосий бакалавриат таълим йўналишлари (магистратура мутахассисликлари) бўйича мутахассислар, жумладан, илмий-педагог кадрларни тайёрлайди, қайта тайёрлайди ва малакасини оширади.
2019/2020-ўқув йилида Тошкент давлат аграр университети Бош муассаса билан ҳамкорликда «Сув биоресурслари ва аквакултура» бакалавриат таълим йўналиши бўйича кундузги шаклда тўлов-контракт асосида рус гуруҳида кадрлар тайёрлашни давом эттиради.
Филиалнинг таълим фаолияти 2020/2021-ўқув йилидан бошланади.
Филиалда қуйидаги бакалавриат таълим йўналишлари (магистратура мутахассисликлари) бўйича кадрлар тайёрланади:
Сув биоресурслари ва аквакультура;
Экология ва табиатдан фойдаланиш;
Балиқ маҳсулотларини ишлаб чиқариш ва қайта ишлаш технологияси;
Балиқчилик хўжалиги иқтисодиёти.
Филиал битирувчиларига Астрахань давлат техника университетининг белгиланган намунадаги дипломи берилади ва ушбу диплом Ўзбекистонда олий таълим тўғрисидаги ҳужжат сифатида эътироф этилади.
Изоҳ (0)