Инновацион ривожланиш вазирлиги томонидан 18 июль куни 64 нафар ёш тадқиқотчи Беларусга тажриба алмашиш учун жўнатилди. Бу ҳақда «Дарё»га вазирлик матбуот хизмати маълум қилди.
Улардан 29 нафари Беларусь фанлар академиясида, Миллий университетда 15 киши, Миллий техника университетида 15 киши, Педагогика университетида эса 5 киши стажировка ўтайди.
22 июль куни эса ёш олимлардан 27 нафари Беларусь тиббиёт академиясига, 2 нафари Техника университетига ҳамда 2 нафари Техника университети қошидаги технопаркка, шунингдек, ОТМларнинг 26 нафар илмий ишлар ва инновациялар бўйича проректорлари ва илмий-тадқиқот институтларининг илм-фан бўйича директор ўринбосарлари тажриба алмашишга юборилади.
Инновацион ривожланиш вазирлиги делегациясининг 2019 йил 8—11 апрель кунлари Беларусга хизмат сафари чоғидаги Минск шаҳрида ўтказилган Фан ва технологиялар соҳасида ҳамкорлик бўйича биринчи қўшма мажлисида ўзбекистонлик ёш олимларни Беларусь Республикасининг нуфузли олий таълим ва илмий тадқиқот муассасаларига илмий стажировка ҳамда дастурларга юбориш бўйича келишувга эришилганди.
Вазирлик томонидан танлов ўтказилиб, рус тилини мукаммал билиши, номзоднинг ёши, олиб борадиган илмий-тадқиқот мавзуси бўйича мавжуд муаммолар ва уларнинг илмий ҳамда амалий ечими бўйича маълумотга эга бўлиши, маҳаллий, халқаро журналларда, конференцияларда мақола ва тезислар билан иштирок этганлиги, IT технологияларидан фойдалана олиш кўникмасига эга бўлиши каби тамойиллар асосида Беларусга юбориладиган ёш олимлар саралаб олинди.
Изоҳ (0)