Британиялик шифокорлар сиам эгизакларини муваффақиятли ажратди

Британиялик жарроҳлар покистонлик сиам эгизаклари муваффақиятли ажратилганини маълум қилди. Бу ҳақда The Guardian хабар берди.

«ТАСС»нинг ёзишича, мураккаб операция Лондондаги болалар касалхонасида ўтказилган ва умумий ҳисобда 50 соат давом этган. Унда малакали шифокорлардан тортиб биомуҳандисларгача турли соҳа вакиллари бўлган 100 дан ортиқ мутахассислар иштирок этган.

Хайбер-Пахтунхва вилоятининг Чарсадда шаҳридан бўлган икки ёшли опа-сингиллар Сафа ва Марва бош суяги қўшилган ҳолда, умумий қон-томир тизими билан туғилган. Нашрнинг ёзишича, эгизакларни ажратиш дастури ўтган йилнинг охирларидан бошланган ва бир неча босқичда амалга оширилган.

Биринчи операция 2018 йилнинг октябрь ойида, болалар атиги 18 ойлик пайтида, иккинчиси ундан икки ой ўтиб ўтказилган. Февраль ойига келиб эса 7 соатлик уринишлардан сўнг шифокорлар опа-сингилларни бутунлай ажратишга эришган.

Операция муваффақиятли ўтиши учун жарроҳлар виртуал реаллик технологиясидан фойдаланган. Улар қизлар бош суягининг аниқ нусхасини яратган бўлиб, бу шифокорларга унинг мураккаб тузилишини, мия ва қон-томирлар жойлашувини яққол кўриш имконини берган.

Шифокорлар, шунингдек уларга янада аниқроқ ишлашга ёрдам берувчи махсус воситалар яратиш учун 3D-босмадан ҳам фойдаланган. Мутахассислар аввал Сафа ва Марванинг қўшилган бош суякларидан ўтган қон-томирларнинг мураккаб тизимини ажратиб олиши зарур эди.

Хабарда айтилишича, биринчи операция давомида жарроҳлар артериал томирни муваффақиятли ажратган. Иккинчи босқичда шифокорлар вена томирларини ажратишга киришган вақтда Сафада кучли қон кетиши бошланган ва шифокорлар уларнинг ҳаётидан жиддий хавотирга тушган. Қиз омон қолган, лекин инсультни бошдан кечирган. Шу сабабли мутахассислар бу ҳолат унинг келажакдаги ҳаётига қандай таъсир кўрсатиши мумкинлигини аниқ айта олмайди.

Февраль ойида ўтказилган якуний босқичда шифокорлар уларнинг умумий трубасимон бош суяги қолдиқларидан фойдаланган ҳолда бошнинг юмалоқ шаклини яратиш билан шуғулланган. Шунга қарамай, дастурнинг муваффақиятли якунлангани ҳақида шифокорлар бугунги кунга келиб эълон қилишга қарор қилган. Эгизаклар касалхонадан 1 июлда чиқарилган бўлиб, ҳозирда улар онаси, бобоси ва тоғаси билан Лондонда яшамоқда. Қизларнинг отаси улар туғилмасиданоқ юрак хуружидан вафот этган. Реабилитация мақсадида қизлар ҳар куни физиотерапия амалиётидан ўтмоқда.