Фаластиннинг Ғазо шаҳрида яшовчи 44 ёшли Маҳмуд Талулий камёб тери касаллиги —Левандоски-Лутц синдроми билан оғрийди, деб ёзмоқда National Geographic.
Ҳозирда дунёда бу касаллик билан оғриган тахминан 10 киши борлиги маълум, бутун тиббиёт тарихида эса 501 та шундай касаликка чалиниш ҳолати кузатилган.
Касаллик ривожланиши давомида одамда даволаб бўлмайдиган дағал ўсмалар пайдо бўлади. Ўсма олиб ташланса, унинг ўрнида янгиси ўсиб чиқаверади ва тери дарахт пўстлоғига ўхшаб қолади. Оқибатда ҳужайралар хавфли турга айланиши мумкин.
Касаллик 1922 йилда аниқланган бўлиб, ҳозирга қадар тўлиқ ўрганилмаган. Маълум бўлишича, иммун тизимидаги бузилишлар сабабли организм одам паппилома вирусига қарши кураша олмайди ва ўсмалар шу сабабли пайдо бўлади. Шунинг учун уларни кесиб ташлашнинг ўзи фойда бермайди, унинг ўрнида янгилари пайдо бўлаверади.
Яқинда Исроилнинг Хадасса шифохонаси шифокорлари бундай беморларга ёрдам бериши мумкин бўлган новаторлик усулини қўллаш муваффақиятли ўтганини маълум қилган. Маҳмуд Талулий шифокорлар унинг касалланган қўлини ампутация қилишни маслаҳат берганидан сўнг юқоридаги шифокорларга мурожаат қилган.
Исроиллик шифокорлар ампутация қилиши чора эмаслигини, ўсмалар бошқа жойда пайдо бўлишни бошлашини айтган. Унинг ўрнига шифокорлар ўсмаларни таг-туги билан кесиб ташлаган. Шундай чуқур кесилганки, ҳатто бемор терисиз қолган ва унга тананинг бошқа қисмларидан олиб кўчирилган. Лекин айнан шу усул ўсмаларни бутунлай олиб ташлашга ёрдам берган.
Шифокорлар бир вақтнинг ўзида беморни одам папиломаси вирусига қарши эмлаган ва ўсмалар пайдо бўлиши секинлашган. Талулий 4 та операцияни бошдан кечирган ва энди уни бешинчиси кутиб турибди, лекин натижаси ҳозирнинг ўзидаёқ кўринмоқда.
Беморнинг қўли аввал дарахтга ўхшаган бўлса, ҳозир тез битиб кетадиган куйиш жароҳатига ўхшайди.
Изоҳ (0)