Универсиада—2019. Ўзбекистон мусобақани 8 та медаль билан якунлади

Италиянинг Неапол шаҳрида бўлиб ўтаётган талабалар ўртасидаги Бутунжаҳон Универсиада ўйинларида Ўзбекистон делегацияси 8 та медалга эга чиқди.

Дастлабки баҳсларда Шри-Ланка, Португалия ва Кипр вакилларини ҳамда чорак финалда америкалик Кееган Жамес Смитни йирик ҳисобда мағлуб этган ўзбекистонлик теннисчи Ҳумоюн Султонов ярим финалда франсиялик Лукас Поуллаиндан 6-0, 6-3 ҳисобида устун келиб, финал йўлланмасини қўлга киритган эди.

Финал учрашувида Хитой Тайпейи вакили Ценг Чун-Хсинга қарши кортга чиққан Ҳумоюн биринчи сетда тай-брейкда ғалаба қозонган бўлса, иккинчи ва учинчи сетда рақибига имкониятни бой бериб қўйди ҳамда кумуш медални қўлга киритди.

Шунингдек, теннисчилар умумжамоа ҳисобида биринчи ўринни эгаллади ва яна бир олтин медални қўлга киритди. Мусобақа регламентига кўра, очколар бўйича теннис баҳсларида умумжамоа ҳисобида биринчи ўринни эгаллаган жамоага ҳам яна бир олтин медаль берилади.

Шу тариқа Ўзбекистон делегацияси бу йилги Универсиада ўйинларини 2 та олтин, 2 та кумуш ва 4 та бронза, жами 8 та медаль билан якунлади. Бу натижа билан Ўзбекистон делегацияси мусобақани умумжамоа ҳисобида 112 мамлакат орасида 19-поғонадан ўрин олди. Бу Осиё мамлакатлари орасида олтинчи, Марказий Осиё минтақаси бўйича эса энг яхши натижа бўлди. Қўшни Қозоғистон Республикаси талаба спортчилари Универсиадада 1 та олтин, 5 та кумуш ва 1 та бронза медалини жамғарди.

Энг кўп медалларни Япония терма жамоаси жамғарди. Кунчиқар юрт вакиллари 33 та олтин, 21 та кумуш ва 28 та бронза медалини тўплашга муваффақ бўлди.

Универсиада—2019 да Ўзбекистон делегациясининг қўлга киритган медаллари:

Олтин:

• Теннис (жуфтликда, Ҳумоюн Султонов ва Санжар Файзиев)
• Теннис (умумжамоа ҳисобида)

Кумуш:

• Ниёз Пўлатов (таэквондо, -63 кг)
• Ҳумоюн Султонов (теннис, яккалик)

Бронза:

• Диёра Келдиёрова (дзюдо, -52 кг)
• Ҳикматуллоҳ Тўраев (дзюдо, -73 кг)
• Муҳаммадкарим Хуррамов (дзюдо, -100 кг)
• Давлат Бобонов (дзюдо, мутлақ вазн)