Universiada—2019. O‘zbekiston musobaqani 8 ta medal bilan yakunladi

Italiyaning Neapol shahrida bo‘lib o‘tayotgan talabalar o‘rtasidagi Butunjahon Universiada o‘yinlarida O‘zbekiston delegatsiyasi 8 ta medalga ega chiqdi.

Dastlabki bahslarda Shri-Lanka, Portugaliya va Kipr vakillarini hamda chorak finalda amerikalik Keyegan James Smitni yirik hisobda mag‘lub etgan o‘zbekistonlik tennischi Humoyun Sultonov yarim finalda fransiyalik Lukas Poullaindan 6-0, 6-3 hisobida ustun kelib, final yo‘llanmasini qo‘lga kiritgan edi.

Final uchrashuvida Xitoy Taypeyi vakili Tseng Chun-Xsinga qarshi kortga chiqqan Humoyun birinchi setda tay-breykda g‘alaba qozongan bo‘lsa, ikkinchi va uchinchi setda raqibiga imkoniyatni boy berib qo‘ydi hamda kumush medalni qo‘lga kiritdi.

Shuningdek, tennischilar umumjamoa hisobida birinchi o‘rinni egalladi va yana bir oltin medalni qo‘lga kiritdi. Musobaqa reglamentiga ko‘ra, ochkolar bo‘yicha tennis bahslarida umumjamoa hisobida birinchi o‘rinni egallagan jamoaga ham yana bir oltin medal beriladi.

Shu tariqa O‘zbekiston delegatsiyasi bu yilgi Universiada o‘yinlarini 2 ta oltin, 2 ta kumush va 4 ta bronza, jami 8 ta medal bilan yakunladi. Bu natija bilan O‘zbekiston delegatsiyasi musobaqani umumjamoa hisobida 112 mamlakat orasida 19-pog‘onadan o‘rin oldi. Bu Osiyo mamlakatlari orasida oltinchi, Markaziy Osiyo mintaqasi bo‘yicha esa eng yaxshi natija bo‘ldi. Qo‘shni Qozog‘iston Respublikasi talaba sportchilari Universiadada 1 ta oltin, 5 ta kumush va 1 ta bronza medalini jamg‘ardi.

Eng ko‘p medallarni Yaponiya terma jamoasi jamg‘ardi. Kunchiqar yurt vakillari 33 ta oltin, 21 ta kumush va 28 ta bronza medalini to‘plashga muvaffaq bo‘ldi.

Universiada—2019 da O‘zbekiston delegatsiyasining qo‘lga kiritgan medallari:

Oltin:

• Tennis (juftlikda, Humoyun Sultonov va Sanjar Fayziyev)
• Tennis (umumjamoa hisobida)

Kumush:

• Niyoz Po‘latov (taekvondo, -63 kg)
• Humoyun Sultonov (tennis, yakkalik)

Bronza:

• Diyora Keldiyorova (dzyudo, -52 kg)
• Hikmatulloh To‘rayev (dzyudo, -73 kg)
• Muhammadkarim Xurramov (dzyudo, -100 kg)
• Davlat Bobonov (dzyudo, mutlaq vazn)