Шерзод Кудбиев Фарғонадаги сайёр қабулда: Қўлида IT бўйича дипломи бор, лекин Power Point’ни билмайди
Ўзбекистон Бандлик ва меҳнат муносабатлари вазири Шерзод Кудбиев Фарғона вилоятида фуқаролар билан сайёр қабулини ўтказмоқда, деб хабар қилди Sputnik.
«Ўтказилган қабул давомида 130 дан ортиқ фуқаролар қатнашди. Меҳнат масалалари ва бандликка оид мурожаатлари тингланди, ижобий ҳал этилди», — дейилади хабарда.
Таъкидланишича, Кудбиев билан учрашувга келган фуқаролар мурожаатининг аксарият қисми иш билан таъминлаш (45 фуқаро), меҳнат ҳуқуқи бузилаётгани (6), оилавий тадбиркорликни йўлга қўйиш (5) билан боғлиқ бўлган.
Натижада, қабул жараёнида 11 нафар мурожаатчининг муаммолари жойида бартараф этилиб, 42 та мурожаатлар белгиланган тартибда кўриб чиқиш учун тегишли ташкилот ҳамда Аҳоли бандлигига кўмаклаши марказларига топшириқлар берилди.
Фуқароларнинг меҳнат ҳуқуқларини бузилишига ҳамда аҳоли билан ишлашда хатоликларга йўл қўйган бир нечта бандликка кўмаклашиш маркази раҳбарлари ишдан озод этилган.
«Дипломида Ахборот технологиялари бўйича мутахассис, деб ёзилган. Айнан шу соҳаларда мутахассислар етишмайди ўзимизда. Лекин IT соҳаси бўйича элементар Power Point программаси нима учун керак, деб сўрасангиз жавоб беришолмаяпти. Мен қандай қилиб қўлидаги дипломи билимига мос келмаган мутахассисни иш берувчига тавсия қиламан? Мана шу каби номутаносибликлар меҳнат бозорида бугунги ишсизликни келтириб чиқараётган сабабларидан биттаси. Буни мен иш берувчи талабини қондирмаслик коэффициенти, деб атайман. Биздаги касб-ҳунар таълим сифати йиллар давомида иш берувчилар талабини қондира олмасдан келди», — деб айтган вазир Фарғона аҳолиси билан бўлиб ўтган мулоқот сўнгида.
