Қозоғистонда ливиялик ишчининг қозоқ қиз билан ножўя сурати сабаб келиб чиққан жанжал оқибатида 30 киши жабрланди (видео)

Қозоғистоннинг Атирау вилоятида жойлашган Тенгиз нефть конида қозоғистонлик ва хорижлик ишчилар ўртасидаги муштлашувда 30 киши жабрланди, деб хабар берди «РБК».

Можарога эса Sohsolited Contracting Endihering анд Prourement S.A.L Offshore (CSER) компаниясининг ливиялик ишчисининг қозоқ қиз билан тушган ножўя сурати сабаб бўлган. Маҳаллий ишчилар ушбу суратни ҳақоратомуз деб топиб, хорижлик ҳамкасбларини дўппослаган.

Таъкидланишича, тиббий пунктда 30 кишига ёрдам кўрсатилган. Ҳалок бўлганлар йўқ.

Қозоғистон ички ишлар вазирлиги вахта посёлкасида юз берган воқеа юзасидан безорилик моддаси бўйича судгача тафтиш бошлаган. «Ички ишлар идоралари ходимлари воқеа иштирокчилари билан профилактика ишлари олиб боришди. Айни вақтда можаро ҳал қилинди», дейилади хабарда.

Воқеа жойига вилоятнинг мансабдор шахслари келиб, ишчилар билан маиший можаронинг авж олишига йўл қўйиб бўлмаслиги ҳақида суҳбат ўтказишган. Шунингдек, конда меҳнат шароитларини ташкиллаштириш масаласи муҳокама қилинган. Учрашувдан кейин ишчилар жойларига тарқалишган, вазият барқарорлашган.

Маълум қилинишича, муштлашувни бошлаганларга нисбатан жиноий иш қўзғатилган. Можарога сабаб бўлган сурат муаллифи видеомурожаат орқали Қозоғистон халқидан узр сўраган. У ўз қилмиши билан бирор кимга зиён етказишни истамагани ва шунчаки ҳамкасби билан тушган суратни эълон қилинганини айтган.