Францияда жазирама иссиқ туфайли табиий ёнғинлар юзага келмоқда

Франциянинг жанубида қарийб 550 нафар қутқарувчи рекорд даражада иссиқ туфайли юзага келган ёнғинларни ўчирмоқда, деб хабар берди «РИА Новости».

Аввалроқ мамлакат метеорологик хизмати Францияда тарихда илк бор ҳаво ҳарорати Цельсий шкаласи бўйича 45 даражадан ошганини маълум қилган. Яқинда эса Франция ИИВ иссиқлик туфайли мамлакатнинг тўртта департаментида метеохавфнинг қизил (энг юқори) даражаси қайд этилганини айтди. Яна 76 та департаментда хавфнинг оловранг даражаси эълон қилинган.

Айни пайтда мамлакат жанубидаги табиий ёнғинларга қарши курашиш мақсадида қарийб 550 нафар қутқарувчи жалб этилган. Улар Франция жанубидаги Гар провинциясида ёнғиннинг 30 дан ортиқ ўчоқларини аниқлаган. Умумий ҳисобда қамраб олинган еттита коммунада ёнғин 460 гектар яшил майдонни йўқ қилган. Коммуналарнинг бирида юз берган ёнғин автомагистрал ёпилишига олиб келган.

Франция ҳукумати фуқароларни аномал иссиқ шароитда ўзининг ва яқинларининг соғлиғига айниқса эътиборлироқ бўлишга чақирган. Бош вазир Эдуар Филипп жазирама иссиқлик сабабли мамлакатдаги 4 мингта мактаб ёпилганини маълум қилган.