АҚШ президенти Дональд Трамп уриб туширилган дрон учун Эронга ҳарбий зарба бериш фикридан бир неча кишининг, жумладан, ўзининг севимли бошловчиларидан бири, Fox News телеканали журналисти Такер Карлсоннинг маслаҳатига қулоқ тутган ҳолда қайтган. Бу ҳақда Тҳе New York Times хабар бермоқда.
Нашр маълумотларига кўра, Карлсон Трамп билан хос суҳбат вақтида Эронга зарба бериш ақлсизлик бўлишини айтган. Шунингдек, телебошловчи Эрон билан бошланажак уруш Трампнинг 2020 йили президентликка қайта сайланишига халал беришини ҳам тушунтирган.
Тҳе New York Times’нинг алоҳида қайд этишича, Карлсон Трампни дрон уриб туширилгани учун Эронга ҳарбий жавоб бериш фикридан қайтаришга уринган ягона инсон эмас.
Маълумот учун, Тҳе New York Times газетаси АҚШ президенти Дональд Трамп Эрондаги бир неча нишонларга ҳарбий зарбалар бериш ғоясини қўллаб-қувватлагани, бироқ сўнгги лаҳзада (10 дақиқа қолганида) зарбалар берилишини бекор қилгани ҳақида биринчи бўлиб хабар берган эди.
Кейинроқ Трампнинг ўзи эса битта уриб туширилган дрон учун 150 кишининг ҳалок бўлиши — номутаносиб жавоб, деган фикрга келгани учун ҳарбий зарба беришни бекор қилганини айтиб ўтган эди.
Изоҳ (0)