AQSh prezidenti Donald Tramp urib tushirilgan dron uchun Eronga harbiy zarba berish fikridan bir necha kishining, jumladan, o‘zining sevimli boshlovchilaridan biri, Fox News telekanali jurnalisti Taker Karlsonning maslahatiga quloq tutgan holda qaytgan. Bu haqda The New York Times xabar bermoqda.
Nashr ma’lumotlariga ko‘ra, Karlson Tramp bilan xos suhbat vaqtida Eronga zarba berish aqlsizlik bo‘lishini aytgan. Shuningdek, teleboshlovchi Eron bilan boshlanajak urush Trampning 2020-yili prezidentlikka qayta saylanishiga xalal berishini ham tushuntirgan.
The New York Times’ning alohida qayd etishicha, Karlson Trampni dron urib tushirilgani uchun Eronga harbiy javob berish fikridan qaytarishga uringan yagona inson emas.
Ma’lumot uchun, The New York Times gazetasi AQSh prezidenti Donald Tramp Erondagi bir necha nishonlarga harbiy zarbalar berish g‘oyasini qo‘llab-quvvatlagani, biroq so‘nggi lahzada (10 daqiqa qolganida) zarbalar berilishini bekor qilgani haqida birinchi bo‘lib xabar bergan edi.
Keyinroq Trampning o‘zi esa bitta urib tushirilgan dron uchun 150 kishining halok bo‘lishi — nomutanosib javob, degan fikrga kelgani uchun harbiy zarba berishni bekor qilganini aytib o‘tgan edi.
Izoh (0)