Журналистлар ижодий уюшмаси Фарғона вилоят бўлими Саудия Арабистони ОАВлари билан ҳам тўғридан–тўғри ҳамкорлик алоқаларини йўлга қўйди.
Аввал хабар берилганидек, ижодий уюшма Фарғона вилоят бўлими ташаббускорлиги ва ташкилотчилигида 11 нафар журналист Саудия Арабистонида бўлди. Дастлаб Умра амалларини бажарган фарғоналик журналистлар Жидда шаҳрида, Ўзбекистоннинг Саудиядаги бош консулхонасида араб оламининг таниқли журналистлари ҳамда газеталари бош муҳаррирлари билан учрашди. Ўзаро тажриба алмашув ва ҳамкорлик мавзусидаги мулоқотлар чоғида ҳозирги глобаллашув шароитида ОАВнинг ўрни, журналист шахси, холислик мезонлари каби муҳим масалалар юзасидан фикр алмашилди.
Журналистлар ижодий уюшмаси Фарғона вилоят бўлими раиси Муҳаммаджон Обидов Саудия ОАВлари билан ахборот алмашув, икки мамлакат газеталари таҳририятларида ўзаро амалиёт ўташни ташкил қилиш юзасидан таклифлар киритди.
— Икки мамлакат халқларини бир-бирлари ҳақидаги ахборот билан таъминлашда муаммо мавжуд экан, келинглар, унинг ечими томон биринчи қадамни қўяйлик. Ўзбекистон журналистлари ижодий уюшмаси Фарғона вилояти бўлими 4 нафар саудиялик газета, телевидение ва интернет журналистини бир ҳафтага Ўзбекистонга, Фарғонага таклиф этади. Бунда уларнинг Ўзбекистонда бўлиш харажатларини зиммамизга оламиз. Ўзбекистонни ўз кўзингиз билан кўринг ва қалбан ҳис этинг. Шундан кейин бу кўҳна диёр билан халқингизни таништиринг. Келгусида эса шундай шарт ва шароитларда фарғоналик журналистлар Саудияга ҳам келади, — деди Муҳаммаджон Обидов.
Таклиф маъқулланди. Ўзбекистоннинг Жиддадаги бош консули Сирожиддин Шамсутдинов ташкилий ишларда воситачиликни зиммасига олди.
Фарғоналик журналистлар Ўзбекистон, жумладан, Фарғона вилоятидаги зиёратгоҳлар, туризм маконлари, инвестиция киритишга яратилган қулайлик ва шарт-шароитлар ҳақида араб тилига ўгириб олиб келган мақола ва фотоларини Саудия ОАВларида эълон қилиш учун топширди.
Изоҳ (0)