Когон шаҳрида яшаган Байрам Ҳодиев (исми-шарифи ўзгартирилган) муқаддам 6 маротаба фирибгарлик жинояти содир этгани учун судланган. Жумладан, охирги маротаба 2016 йил 4 октябрда фирибгарлик учун 4 йил 6 ой муддатга озодликдан маҳрум қилиш жазоси тайинланиб, 2018 йил 16 май куни ўталмай қолган жазони ўташдан муддатидан илгари шартли озод қилинган эди. Бу ҳақда «Дарё»га Жиноят ишлари бўйича Когон шаҳар суди раиси Зариф Шеров хабар берди.
Ҳодиев 2018 йил июнь ойидан август ойига қадар бўлган вақт оралиғида фуқаро Насиба Зоҳидовага ўзини ДХХда юқори лавозимда ишлаб келаётганлигини айтиб алдаб, Бухоро тумани ҳудудида намунавий лойиҳа асосида қурилаётган уй-жойлардан олиб беришни ваъда қилган ва ундан уй олиб бериш учун 18 000 доллар олган.
Иш ҳолатларига кўра, жабрланувчи бу пулларни умр бўйича ўзи ва акаси билан бирга уй сотиб олиш мақсадида жамлаб келган.
Шундан сўнг, Б. Ҳодиев фуқаро Дилшод Фозиловга пора эвазига Давлат хавфсизлик хизмати органларига ишга жойлаштиришни ваъда қилган.
Лекин Б. Ҳодиевнинг бу галги фирибгарлиги охирига етмади. У 2018 йил 27 ноябрь куни соат 17:30 ларда Когон шаҳридаги «Ўзтемирйўл йўловчи» АЖнинг Бухоро филиалига қарашли автотураргоҳда фуқаро Д. Фозиловдан 15 000 000 сўм пулни олаётган вақтида ўтказилган тезкор тадбир давомида жиноят устида ашёвий далил билан қўлга олинган.
Жиноят ишлари бўйича Когон шаҳар судининг 2019 йил 26 мартдаги ҳукми билан Б. Ҳодиевга Жиноят кодекси 25,168-модда 3-қисми «б» банди, 168-модда 4-қисми «а» банди ва 28, 211-модда 2-қисми «а» банди билан жами 9 йил 6 ой муддатга озодликдан маҳрум қилиш жазоси тайинланиб, жазони қаттиқ тартибли колонияларда ўташ белгиланди.
Шу билан бирга, судланувчи Б. Ҳодиевдан жабрланувчи Н. Зоҳидова фойдасига 151 019 460 сўм ундириш белгиланди.
Изоҳ (0)