Соғлиқни сақлаш вазирлиги Сурхондарёда ҳомиладор аёл вафот этиши билан боғлиқ вазиятга ойдинлик киритди

Республика Давлат санитария эпидемиология назорат маркази Бойсун туманида ҳомиладор аёлнинг вафот этганлиги юзасидан текширув ишларини олиб борди. Бу ҳақда «Дарё»га Соғлиқни сақлаш вазирлиги матбуот хизмати маълум қилди.

Сурхондарё вилояти, Бойсун тумани Омонхона қишлоғида яшаган, 1995 йилда туғилган З.Х. 2019 йил 13 май куни Бойсун туман тиббиёт бирлашмаси туғруқ комплекси гинекология бўлимига ётқизилган.16 май куни бемор аҳволи оғирлашгандан сўнг туғруқ комплексининг жонлантириш бўлимига ўтказилади. 17 май куни эса беморда бурундан қон кетиш аломатлари бошлангач, вилоят маслаҳат гуруҳининг гематолог ва ЛОР шифокорлари томонидан кўрикдан ўтказилиб, «Ҳомиладорлик 17 ҳафталик, бурундан қон кетиши, Д.V.С гипокогуляция босқичи» ташхиси қўйилган. Бундан ташқари, шифохона неврологи ва тор мутахассислар томонидан консултация қилинган.

Беморга 18 май куни интенсив муолажалар ҳамда 1,5 литр қон зардоби ва 500 миллилитр эритроцитар масса қуйилган. Бемор 19 май куни «Ўткир юрак етишмовчилиги, DVС синдроми» натижасида вафот этган. Беморда қон кетиш аломатлари ва инъэксия қилинган жойларда қон талашлар бўлганлигини инобатга олиб, патологоанатомик бўлимда мурдадан арбовирусларга текшириш учун қон намунаси олинган.

Қашқадарё вилоят ДСЭНМнинг ўта хавфли юқумли касалликларни текшириш лабораториясига юборилган қон намуналари текширилганда Қрим-Конго гемморагик иситма касаллиги аломатлари аниқланган.

Мазкур касалликнинг юқиш хавфи юқорилиги боис вилоят ДСЭНМ бошқармаси мутахассисларидан иборат гуруҳ тегишли меъёрий ҳужжатлар асосида касаллик ўчоғида тўлиқ муолажалар ва парвариш ишлари амалга оширилди. Марҳум беморнинг оила аъзолари ва у билан мулоқотда бўлганлар тиббий кўрикдан ўтказилганда уларга Қрим-Конго гемморагик иситма касаллиги юқмаганлиги аниқланди.

Давлат санитария эпидемиология назорат марказининг қайд этишича, ҳар йили баҳор ва ёз мавсумида кўплаб мамлакатларда бўлгани каби Ўзбекистонда ҳам айрим ҳолатларда ушбу касаллик учраб туради. Агар касаллик вақтида аниқланса, даволаш мумкин, шу сабабли хавотирга ўрин йўқ.

Аҳолидан санитария қоидаларига қаътий риоя этиш, жумладан, чорва парваришида эҳтиёт чораларини кўриш, каналарни қўлда ўлдирмаслик, агар танада иситма пайдо бўлса, зудлик билан шифокоркорга мурожаат этишлари сўралган.