Жиноят ишлари бўйича Яккабоғ туман судининг 2019 йил 19 апрелдаги сайёр суд мажлисида туман электр таъминоти корхонаси манфаатига 13 миллион 738 минг сўм зарар келтирган фуқаро С.Ўроқов иши кўриб чиқилиб, унга нисбатан суд ҳукми ўқилди. Бу ҳақда «Дарё»га МИБ Қашқадарё вилоят бошқармаси матубот хизмати раҳбари Гулноза Дилмуродова хабар бермоқда.
МИБ Қамаши туман бўлими ходимлари томонидан 2017 йил 18 октябрда ўтказилган мониторинг давомида тумандаги «Гулшан» МФЙда яшовчи фуқаро С.Ўроқов қонунга зид равишда яшаш уйидаги новвойхонасида умумий фойдаланишдаги электр энергиясига тўғридан-тўғри уланиб, бир дона лой тандир ичига қўлбола спирал ўрнатиб, электр энергиясидан ноқонуний фойдаланиб келгани аниқланган. Оқибатида туман электр таъминоти корхонаси манфаатларига 6 миллион 178 минг 52 сўм миқдорида зарар етказганлиги аниқланиб, унга нисбатан Маъмурий жавобгарлик тўғрисидаги Кодекснинг 101-моддасига асосан жарима жазоси қўлланилган.
Бундан тегишли хулоса чиқармаган истеъмолчи кейинчалик умумий фойдаланишдаги электр тармоғига ўзбошимчалик билан уланиш жиноятини содир қилган. 2018 йил 15 ноябрдаги навбатдаги рейдда фуқаро яшаш ҳовлисидаги новвойхонада қўлбола лой тандирга метал симни ўраб спирал ясаб, ушбу спирални яшаш уйи ёнидан ўтган умумий фойдаланишдаги электр энергиясига, яъни 0.4 кВт ҳаво линиясига ўзбошимчалик билан тўғридан-тўғри улаб, рейд ўтказилган кунга қадар 30 240 кВт/соат электр энергиясидан ноқонуний фойдаланиши оқибатида туман электр таъминоти корхонасига 7 миллион 560 минг сўм зарар етказгани аниқланган.
Сайёр суд мажлисида судланувчи Жиноят кодексининг 185/2-моддаси (Электр, иссиқлик энергияси, газ, водопроводдан фойдаланиш қоидаларини бузиш) 1-қисмида кўрсатилган жиноятни содир этган деб топилиб, унга нисбатан энг кам ойлик иш ҳақининг 15 фоизини давлат даромадига ушлаб қолган ҳолда 7 ой муддатга ахлоқ тузатиш иши жазоси тайинланган. Етказилган зарарни туман электр таъминоти корхонаси манфаатларига ундириш белгиланган.
Изоҳ (0)