Фуқаролик ишлари бўйича Шаҳрисабз туманлараро судининг 2018 йил 1 октябрдаги қарорига кўра, автоҳалокат туфайли ота-онасидан бевақт етим қолган 5 ёшли Асадбек ва 3 ёшли Умидахон бобоси Бахтиёр Мейлиев тарбиясига берилган эди. Суд қарори ижросини таъминлашга киришган МИБ ходимлари автоҳалокатдан сўнг болаларни олиб қолган тоғаси Шуҳрат Ризаев хонадонидан топа олмагач, қидирувга берган. Бу ҳақда «Дарё» МИБ Қашқадарё вилоят бошқармаси матбуот хизмати хабар бермоқда.
Маълум бўлишича, ота-онасидан етим қолган фарзандлар даставвал тоғаси Шуҳрат Ризаев тарбиясида қолган эди. Болаларнинг бобоси Бахтиёр Мейлиев набираларини қайтариб олиш, ўзи тарбиялаб вояга етказиш учун кўп уринган. Аммо ўзаро келишишнинг фойдаси бўлмагач, бу иш судда ҳал қилинадиган бўлди. 2018 йил 1 октябрда суд бўлиб ўтгач, суд қарори ижроси 2018 йил 15 ноябрда Мажбурий ижро бюроси Яккабоғ туман бўлими иш юритувига келиб тушиб, ушбу куни ижро иши қўзғатилган.
Бюронинг туман бўлими ходимлари болаларни тоғасиникидан топа олмагач, уларга нисбатан 2019 йил 23 январь куни қидирув эълон қилган.
Мажбурий ижро бюроси Қашқадарё вилоят бошқармасининг Ахборот таминоти ва мол-мулк қидируви шўъбаси ходимларининг саъй-ҳаракатлари билан болалар 19 апрель куни Тошкент вилояти, Янгийўл туманида яшовчи тоғалари Э. ва Ш.Холдоровлар қарамоғида эканлиги аниқланган ва ушбу куни болаларни Самарқанд вилоятида истиқомат қилувчи бобоси Бахтиёр Мейлиевга олиб берилиши таъминланган.
Изоҳ (0)