Бугун, 27 апрель куни Ўзбекистон Мудофаа вазири генерал-майор Баҳодир Қурбонов Хитой давлат кенгаши аъзоси, мудофаа вазири генерал-полковник Вей Фенхе бошчилигидаги ХХР ҳарбий делегациясини қабул қилди. Бу ҳақда Мудофаа вазирлиги матбуот хизмати «Дарё»га маълум қилди.
Учрашувда ўзбек—хитой ҳамкорлигининг мудофаа ва ҳарбий таълим саҳосидаги ҳолати ва ривожланиш истиқболлари муҳокама қилинди, ҳарбий-техник йўналишда ўзаро манфаатли алоқаларни мустаҳкамлаш бўйича фикр алмашинди. Икки давлат мудофаа идоралари мутахассислари томонидан турли йўналишларда тажриба алмашиш учун мунтазам равишда амалга оширилаётган ташрифларининг аҳамияти алоҳида қайд этилди.
Ўзбекистон Мудофаа вазири меҳмонларни қизғин қутлаб, Ўзбекистон Президентининг Хитойга 2017 йил май ойидаги давлат ташрифи икки мамлакат муносабатларида янги саҳифа очди ҳамда ўзбек-хитой ҳамкорлиги ривожланишининг тарихий босқичи бўлганини қайд этди.
«Икки томонлама самарали ҳамкорликнинг ўтган йилларини баҳолаган ҳолда ишонч билан айтиш мумкинки, Хитой, бу – дўстлик, ҳамкорлик ва ўзаро қўллаб-қувватлаш алоқалари тобора мустаҳкамланаётган, ишончли, вақт синовидан ўтган стратегик ҳамкордир», – деди генерал-майор Баҳодир Қурбонов.
Ўзбекистон мудофаа идораси бошлиғи Ўзбекистон Хитой билан энг аввало, ҳар иккала давлат учун манфаатли, аниқ амалий кўринишдаги қўшма ҳамкорликни ривожлантириш борасида икки томонлама алоқаларни чуқурлаштиришдан манфаатдорлигини таъкидлади.
Учрасув якунида Ўзбекистон ва Хитой мудофаа вазирликлари ўртасида 2019 йилга икки томонлама ҳарбий ҳамкорлик режаси имзоланди.
Изоҳ (0)