Наманган вилояти ҳокими Хайрулло Бозаров Учқўрғон туманидаги стадионда сайёр қабул ўтказди. Бу ҳақда «Дарё»га вилоят ҳокимлиги ахборот хизмати маълум қилди.
Аҳоли билан тўғридан-тўғри мулоқотни кенгайтириш, мавжуд долзарб муаммоларни аниқлаш, уларни бевосита жойида бартараф этиш юзасидан аниқ ва тезкор чоралар кўриш мақсадида ташкилланган сайёр қабулда сектор раҳбарлари, вилоятдаги бошқарма ва идоралар бошлиқлари ҳамда бошқа мутасаддилар қатнашди.
Вилоятнинг барча туманларидан келган фуқаролар вакиллари билан юзма-юз мулоқот асосидаги қабул давомида уй-жой, моддий ёрдам, коммунал хизмат, банк, ҳуқуқни муҳофаза қилиш идоралари фаолияти, соғлиқни сақлаш, бандлик, тадбиркорлик, фермер хўжалигини юритиш ва бошқа масалаларга оид 311 та мурожаат келиб тушди.
Шундан 161 таси жойида ижобий ҳал этилди. 10 та мурожаат бўйича ҳуқуқий тушунтириш берилди. Қолган 140 таси қонунчиликда белгиланган муддатларда ўрганиб, чора кўриш учун тегишли ташкилот ва идораларга юборилиб, ижроси назоратга олинди.
Жумладан, вилоят соғлиқни сақлаш бошқармаси томонидан имтиёзли даволаниш учун 6 та ордер, 4 та ногиронлик аравачаси, сиҳатгоҳларга 5 та йўлланма, эшитиш мосламалари, ортопедик воситалар берилди.
Давлат хизматлари маркази томонидан 166 та хизмат кўрсатилди. Жумладан, уй-жойга бўлган ҳуқуқни тиклаш юзасидан 96 та, мактабгача таълим муассасасига навбатга қўйиш бўйича 25 та ариза қабул қилинди, 45 нафар фуқарога СТИР берилди.
Изоҳ (0)