Жиззахда 14 нафар фуқарони 328 млн сўмга чув туширган эр-хотин фирибгарларга ҳукм ўқилди

Жиноят ишлари бўйича Мирзачўл туман суди раиси Мақсуд Райимов «Дарё»га эр-хотин фирибгарларга нисбатан чиқарилган суд ҳукмини тақдим этди.

Салим Савронов ва унинг турмуш ўртоғи Маҳфуза Савронова (барча исм-шарифлар ўзгартирилган) ўзганинг мулкини фирибгарлик йўли билан қўлга киритиш мақсадида жиноий тил бириктириб, Жиззах шаҳрида яшовчи фуқаро Ф.Давуровнинг олдига бориб, унга «сотиладиган тилла тақинчоқларингиз борлигини эшитиб олдингизга келяпмиз, ушбу тилла тақинчоқларингизни бизга берсангиз қиммат нархда 5—6 кунда сотиб пулингизни берамиз», — деб уни ишонтириб, 120 грамм турли хилдаги баҳоси 24 000 000 сўмлик тилла тақинчоқларини фирибгарлик йўли билан қўлга киритиб, берган ваъдасини бажармасдан, қўлга киритилган моддий қимматликларни шахсий манфаатларига ишлатиб юборган.

Эр-хотин фирибгарлар жиноий фаолиятини давом эттириб, фуқаро С.Валиеванинг жами 25 350 000 сўмлик тилла занжирларини, I.Равшанованинг Ўзбекистон Республикаси миллий валютасига нисбатан киймати 5 032 440 сўм бўлган 630 АҚШ доллар пулларини, Н.Фармонованинг жами бўлиб, 62 150 000 сўмлик пулларини, I.Гулмаматованинг жами бўлиб 56 661 000 сўмлик пулларини, Н.Ҳайдарованинг 27 977 000 сўм бўлган 120 000 грам тилла тақинчокларни, М.Исломованинг 4 820 000 сўмлик пулларини, Қ.Холматованинг жами бўлиб, 15 000 000 сўмлик пулларини, М.Муродованинг 10 000 000 сўм, О.Боқиеванинг 12 000 000 сўм, С.Абдуллаеванинг 4 000 000 сўмлик, Г.Тожиеванинг 12 200 000 сўмлик, А.Абдурашидовнинг 80 000 000 сўм пулларни, А.Абдувалиевнинг 16 000 000 сўм пулларни фирибгарлик йўли билан қўлга киритиб, берган ваъдасини бажармасдан, пулларни шахсий манфаатларига ишлатиб юборган.

Суд Маҳфуза Савроновага Ўзбекистон Республикаси ЖК 168-моддаси (фирибгарлик) 3-қисмининг «а,б» бандлари билан 5 (беш) йил 3 (уч) ой озодликдан маҳрум қилиш жазоси тайинлаб, унга нисбатан мазкур ҳукм билан тайинланган озодликдан маҳрум қилиш жазосининг ижроси Ўзбекистон Республикаси ЖПКнинг 533-моддаси 1-қисми 3-банди талабига кўра, унинг 2019 йил 1 февралда туғилган фарзанди уч ёшга тўлгунга қадар яъни 2022 йил 1 февралгача кечиктирди.

Шунингдек, суд Салим Савроновга Ўзбекистон Республикаси ЖК 168-моддаси (фирибгарлик) 3-қисмининг «а,б» бандлари билан 7 (етти) йил муддатга озодликдан маҳрум қилиш жазоси тайинлаб, жабрланувчиларга етказилган моддий зарарларни ундириш белгиланди.