Мўйноқда ўтказилган «NavrUZ» этнофестивали якунида қор ёғди (фото)

Мўйноқда Наврўз байрами этнофестиваль тарзида ўтказилди. Бу ҳақда ЎзА хабар берди.

Илк бор ўтказилаётган ушбу тадбирга минглаб маҳаллий ва хорижий меҳмон ташриф буюрди. Икки кунлик тадбирнинг иккинчи кунида Мўйноқда эрталаб оппоқ қор ёғди.

30 март куни байрам тадбирлари асосан туман марказида ташкил қилинган «Ҳунармандлар қишлоғи»да бўлиб ўтди. Бу ерда уста-ҳунармандларнинг қўл меҳнатлари, ошпазлар томонидан тайёрланган турли хил миллий таомлар кўргазмага қўйилган. Байрамга бағишланган савдо ярмаркаларида маҳсулотлар арзон нархларда сотилмоқда. Кўргазмада нашриётлар томонидан китоблар ҳам сотувга қўйилган.

«Ҳунармандлар қишлоғи»да балиқчининг эски уйи қайта таъмирланиб уй музейига айлантирилган. Айнан шу музей қошида сайёҳлар учун хостел ҳам ташкил қилинган. Хорижий меҳмонларнинг ушбу хостелда денгиз турмуши билан яшашига имконият яратилган. Шунингдек, уй музейи қошидаги дўконда Орол ва Мўйноққа ҳамда қорақалпоқлар ҳаётига оид ҳар хил сувенирлар сотувга қўйилгани кўпчиликни қизиқтирмоқда.

Миллий куй-қўшиқлар садоси остида бўғирсоқ, сок-тақан тайёрланди, сумалак ва Наврўз кўжа қайнатилди. Фольклор жамоаси томонидан беташар, суннат тўй каби миллий тўй-базмлар ижро этилди. Бир томонда қорақалпоқ ўтовини тикиш жараёни йиғилганларга намойиш қилинаётган бўлса, иккинчи томонда миллий болалар ўйинлари бўйича мусобақалар қизиди. «Ҳунарманд» уюшмаси томонидан миллий кийимлар модаси намойиши ўтказилди. Учта жойда арғимчоқ қурилиб, уларда болалардан тортиб ёши катталар ҳам учиб кўнгил ёзди.

Кураш мусобақаси ҳам қизғин тус олди. Моҳир дорбознинг кўзи бойланган ҳолда дор устига тортилган ипда моҳирона томоша кўрсатиши катта таассурот уйғотди. Қалдирғоч, балиқ ва пуштиранг фламинголарнинг қиёфасидаги варраклар болажонларнинг энг севимли машғулотлари бўлди.

Шу куни Мўйноқда ўтказилган тадбирга Нукус давлат педагогика институтининг филология ва педагогика факультетларидан 100 нафардан ортиқ талаба ҳам миллий кийимларда иштирок этди. Улар Мўйноқнинг эътиборли жойларига ҳам саёҳат уюштирди.

31 март куни карвон юриши ва гала концерт бўлиб ўтиши керак эди, лекин Мўйноқда эрталаб ёққан оппоқ қор тадбирларнинг бошқа кунга қолдирилишига сабаб бўлди.

Мўйноқликлар кўпдан буён бундай ёғингарчиликни кузатмаган эди. Наврўзда ёққан қор денгизнинг қуриган тагига ўтқазилган саксовул кўчатлари учун айни муддао бўлди. Оролбўйида эса байрам давом этади.