31 март куни «Дарё» ҳуқуқшунос Хушнудбек Худайбердиевга таяниб, «Ўзбекистонда хориждаги дипломларни нострификация қилиш энди яна ҳам осонлашди» сарлавҳали хабар эълон қилган эди. Муаллиф ушбу хабар юзасидан баъзи тузатишларни маълум қилди.
«Ўша постнинг 2 та жойида «нострификация» сўзи нотўғри кетиб қолибди. Чунки унда баён қилинган ўзгариш, фақат тан олишга тааллуқли, нострификацияга эмас. Ҳа, буларнинг бир-биридан фарқи бор.
Хорижий давлатларда таълим олганлик тўғрисидаги ҳужжатларни тан олиш деганда ваколатли давлат органларининг Ўзбекистон бутун ҳудудида ушбу ҳужжатларнинг қонуний кучга эга эканлигига розилиги тушунилади.
Нострификациялаш (эквивалентлигини қайд этиш) деганда эса ваколатли давлат органлари томонидан ушбу ҳужжатлар эгалари тайёргарлиги даражаси мувофиқлигини белгилаш ва уларга Ўзбекистон Республикасининг таълим тўғрисидаги ҳужжатларига эга бўлган шахсларга берилгани каби академик ва (ёки) касбий ҳуқуқлар берилиши тушунилади.
Низомнинг 18-бандига биноан, маълумот Ўзбекистон қонунчилигида кўзда тутилмаган таълим шаклида олинган бўлса, нострификация, яъни ҳужжатларнинг эквивалентлиги тўғрисидаги салбий хулоса қабул қилинади (рад қилинади).
Ушбу банд ҳалиям ўз кучида турибди», — дейилади хабарда.
Изоҳ (0)