Бухоро шаҳрида 1 апрель – кулги ва мутойиба куни муносабати билан «Насриддин Афанди кунлари» ҳамда «Шарқ таомлари» фестиваллари бўлиб ўтди.
— Бухоро нафақат, меъморий обидалари, балки номоддий маданий мероси, ўзига хос миллий анъаналари билан ҳам довруғ қозонган. Бинобарин, ҳудудга сайёҳларни жалб қилиш имкониятлари кенг бўлиб, улардан самарали фойдаланиш аҳамиятлидир. Халқнинг бой маданий меросини асраб-авайлаш, ёш авлод ўртасида халқ томошалари, айниқса, кулги томошалари, фолклор, ҳажвий қўшиқчилик, сўз санъат усталари анъаналарини тарғиб қилишга қаратилган қувноқ «Насриддин Афанди кунлари» ҳамда меҳмондўстлигимиз тимсоли бўлган «Шарқ таомлари» фестиваллари туризм салоҳиятини янада ривожлантиришга ҳисса қўшади», — деди Бухоро шаҳри ҳокими Карим Камолов ўз сўзида.
«Арк» қўрғони, «Тоқи Саррофон», «Тоқи Телпакфурушон», «Тоқи Заргарон» савдо мажмуаларида турли тадбирлар, дор ўйинлари, Ошиқ дароз ва Маъшуқ танноз тимсоллари ҳамда халқона услубдаги Чодирхаёл масхарабозлик томошалари бўлиб ўтди. Кўкалдош мадрасасида вилоят Қўғирчоқ театри жамоасининг чиқиши намойиш этилди. Бухоро санъат музейи ёнидаги майдонда амалий ва бадиий ҳамда ҳажвий расмлар кўргазмалари ўтказилди. Ўндан зиёд фолклор-этнографик ансамбллар этнографик қўшиқлар ижро этди.
Халқ амалий ва бадиий санъат кўргазма-ярмаркаси, ҳажвий расмлар кўрик-танлови, ҳажвий китоблар тақдимоти, шунингдек, Шарқ таомлари ва бошқа турдаги озиқ-овқат маҳсулотлари кўргазмалари ўтказилди.
— Хўжа Насриддин Афанди образини қойилмақом бажара олган театр санъати актёрлари Баҳриддин Розиқов ҳамда Мажид Очиловларнинг кўнгилочар дастурлари қизғин таассуротларга бой бўлди. Шунингдек, мутойиба куни муносабати билан Бухоро давлат университетининг «Афандининг жиянлари» қувноқлар ва зукколар жамоасининг чиқишларифестиваль шукуҳини оширди. Ёш ҳаваскорлар ижросидаги ичакузди ҳангомалар, аскияю театрлаштирилган томошаларга минглаб кишиларнинг тўплангани халқимизнинг бетакрор кулгу санъатига ўч эканлигини яна бир карра исботлади», — деди БухДУ туризм факультети декани Аброр Жўраев.
«Бухоро ёшлари» газетаси қошидаги «Парвоз» ёш репортёрлари гуруҳи аъзолари эса фестивалда иштирок этаётган хорижлик сайёҳлар билан суҳбатлар уюштирди, уларни рақсларга чорлаб, мутойибага бой интерактив ўйинлар кўрсатишди.
Изоҳ (0)