Наманганда «Обод қишлоқ» дастури доирасидаги объектлар фойдаланишга топширилди (фото)

Наманган вилоятининг Янгиқўрғон туманидаги Нанай қишлоғида «Обод қишлоқ» дастури доирасидаги объектларни фойдаланишга топшириш маросими бўлиб ўтди. Бу ҳақда «Дарё» мухбири хабар бермоқда.

Дастур доирасида 3 миллиард сўм сарфланиб, қишлоқ маданият маркази қайтадан бунёд этилди.

Мазкур марказдан 200 ўринли зал, кутубхона ўрин олган, қўшиқчилик, рақс, торли асбоблар ва зардўзлик тўгараклари ишлаб турибди.

Тадбирда иштирок этган Президент маслаҳатчиси Турсинхон Худойбергенов буткул янгича қиёфага кирган Нанай маданият маркази қишлоқ аҳлининг ҳақиқий дам олиш масканига айланиши зарурлиги, бу ерда доимий тарзда спектакллар, концертлар қўйиб борилиши, кўргазмалар ташкил этиш лозимлигини таъкидлади.

Нанайда умумий қиймати 3 миллиард сўмдан ортиқ бўлган ободонлаштириш ва қурилиш ишлари олиб борилди. Жумладан, 6,2 километр янги электр тармоқлари тортилди, 2 та замонавий трансформатор, 200 га яқин тунги ёритиш чироқлари ўрнатилди. 1,2 километр асфальт ётқизилиб, 654 та лоток ўрнатилди. Ҳудудни кўкаламзорлаштириш мақсадида 200 миллион сўмлик манзарали дарахтлар ўтқазилди, мавжудларига янгича шакл берилди.

Art Soft Tex Group корхонаси томонидан салкам 35 миллиард сўм маблағ сарфланиб, бир пайтлар фаолияти тўхтаб қолган «Тоғ гўзали» фабрикаси ишга туширилди ва 200 та янги иш ўрни яратилди. Корхона томонидан 120 ўринли мактабгача таълим муассаси қайта қурилиб, болалар мебели, аттракционлар билан жиҳозланди, ўқув қуроллари, ўйинчоқлар келтирилди. Боғча билан олдинроқ танишган Мактабгача таълим вазири Агриппина Шин таъкидлаганидек, «бу ерда яратилган шароитлар ҳатто Тошкентда ҳам йўқ».

Қишлоқдаги бунёдкорлик ишларига маҳаллий тадбиркорлар ҳам муносиб ҳисса қўшди. Жумладан, тадбиркор Ҳусанбой Акбаров томонидан 250 миллион сўм сарфланиб, «Нанай» супермаркети барпо этилди. Тадбиркор Элёр Худойбердиев эса 150 миллион сўм эвазига фаввора ва музқаймоқ павильонини ишга туширди. Шунингдек, қишлоқда «Ҳумо» тантаналар мажмуаси, 20 ўринли мўъжаз меҳмонхона қад ростлади.

Маросимда сўзга чиққан вилоят ҳокими Хайрулло Бозоров Нанайдаги бунёдкорлик ишлари бу билан тўхтаб қолмаслиги, қишлоқдаги қаровсиз ҳолга келиб қолган сиҳатгоҳ ва болалар оромгоҳлари ўрнида хорижий ва маҳаллий инвесторлар томонидан замонавий санаторийлар барпо қилиниши, бу бўйича ҳаракатлар аллақачон бошлаб юборилганини қайд этди.

Шу куннинг ўзида Нанай маданият марказида қишлоқ аҳолисига «Тақдир эшиги» номли спектакл ва концерт дастури намойиш этилди.