Namangan viloyatining Yangiqo‘rg‘on tumanidagi Nanay qishlog‘ida “Obod qishloq” dasturi doirasidagi obyektlarni foydalanishga topshirish marosimi bo‘lib o‘tdi. Bu haqda “Daryo” muxbiri xabar bermoqda.
Dastur doirasida 3 milliard so‘m sarflanib, qishloq madaniyat markazi qaytadan bunyod etildi.
Mazkur markazdan 200 o‘rinli zal, kutubxona o‘rin olgan, qo‘shiqchilik, raqs, torli asboblar va zardo‘zlik to‘garaklari ishlab turibdi.
Tadbirda ishtirok etgan Prezident maslahatchisi Tursinxon Xudoybergenov butkul yangicha qiyofaga kirgan Nanay madaniyat markazi qishloq ahlining haqiqiy dam olish maskaniga aylanishi zarurligi, bu yerda doimiy tarzda spektakllar, konsertlar qo‘yib borilishi, ko‘rgazmalar tashkil etish lozimligini ta’kidladi.
Nanayda umumiy qiymati 3 milliard so‘mdan ortiq bo‘lgan obodonlashtirish va qurilish ishlari olib borildi. Jumladan, 6,2 kilometr yangi elektr tarmoqlari tortildi, 2 ta zamonaviy transformator, 200 ga yaqin tungi yoritish chiroqlari o‘rnatildi. 1,2 kilometr asfalt yotqizilib, 654 ta lotok o‘rnatildi. Hududni ko‘kalamzorlashtirish maqsadida 200 million so‘mlik manzarali daraxtlar o‘tqazildi, mavjudlariga yangicha shakl berildi.
Art Soft Tex Group korxonasi tomonidan salkam 35 milliard so‘m mablag‘ sarflanib, bir paytlar faoliyati to‘xtab qolgan “Tog‘ go‘zali” fabrikasi ishga tushirildi va 200 ta yangi ish o‘rni yaratildi. Korxona tomonidan 120 o‘rinli maktabgacha ta’lim muassasi qayta qurilib, bolalar mebeli, attraksionlar bilan jihozlandi, o‘quv qurollari, o‘yinchoqlar keltirildi. Bog‘cha bilan oldinroq tanishgan Maktabgacha ta’lim vaziri Agrippina Shin ta’kidlaganidek, “bu yerda yaratilgan sharoitlar hatto Toshkentda ham yo‘q”.
Qishloqdagi bunyodkorlik ishlariga mahalliy tadbirkorlar ham munosib hissa qo‘shdi. Jumladan, tadbirkor Husanboy Akbarov tomonidan 250 million so‘m sarflanib, “Nanay” supermarketi barpo etildi. Tadbirkor Elyor Xudoyberdiyev esa 150 million so‘m evaziga favvora va muzqaymoq pavilyonini ishga tushirdi. Shuningdek, qishloqda “Humo” tantanalar majmuasi, 20 o‘rinli mo‘jaz mehmonxona qad rostladi.
Marosimda so‘zga chiqqan viloyat hokimi Xayrullo Bozorov Nanaydagi bunyodkorlik ishlari bu bilan to‘xtab qolmasligi, qishloqdagi qarovsiz holga kelib qolgan sihatgoh va bolalar oromgohlari o‘rnida xorijiy va mahalliy investorlar tomonidan zamonaviy sanatoriylar barpo qilinishi, bu bo‘yicha harakatlar allaqachon boshlab yuborilganini qayd etdi.
Shu kunning o‘zida Nanay madaniyat markazida qishloq aholisiga “Taqdir eshigi” nomli spektakl va konsert dasturi namoyish etildi.
Izoh (0)