Бугун,

  • USD 10940.05
  • RUB 182.26
  • EUR 11121.65

9 март куни Андижонда Ўзбекистон Олий суди раиси Козимжон Комилов ва Олий суд судьялари томонидан сайёр қабул ўтказилди. Сайёр қабулда Исроил Сайидназаровнинг мурожаати ҳам кўриб чиқилди. Бу ҳақда «Дарё» мухбири хабар бермоқда.

Фото: Рустам Эшонов

Фото: Рустам Эшонов

60 ёшли Исроил Сайидназаров Марҳамат тумани Бешмирза маҳалласидан, касби қурувчи. 2017 йилда Тошкент вилоятининг Зангиота туманида меҳнат қилган. Ижарада яшаётган хонадонига кечаси номаълум кимсалар бостириб кирган. Шунда у ўзини ҳимоя қилиш мақсадида қаршилик қилишга уринган ва натижада бахтсиз ҳодиса туфайли босқинчиларга оғир шикаст етказган.

2017 йилнинг 27 март куни унга Зангиота тумани суди томонидан Жиноят Кодексининг 104-моддаси 3-қисми «а» банди (икки ёки ундан ортиқ шахсга нисбатан қасддан баданга оғир шикаст етказиш) билан тўрт йилга озодликдан маҳрум қилиш жазоси тайинланган. Ўз айбига иқрорлиги ва пушаймонлиги туфайли 2018 йилнинг 15 январида Жиноят ишлари бўйича Навоий шаҳар суди томонидан белгиланган жазо шартли равишда ахлоқ тузатиш ишларига алмаштирилган.

Исроил Сайидназаров Олий суд раисига ёши ва белгиланган жазодан тўғри хулоса чиқарганини айтиб, жазодан озод этишларини илтимос қилди. Унинг илтимоси Марҳамат тумани суди томонидан қайта кўриб чиқилди ва ЖКнинг тегишли моддаларига асосан ўталмай қолган 10 ой 13 кун жазо олиб ташланиб, муддатидан илгари шартли озод қилинди.

— Бугунги мурожаатим қаноатлантирилиб, қайта кўриб чиқилганлигидан хурсандман, — дейди Исроил Сайидназаров. – Умримнинг қолган қисмини яхши ишларга сарфлашга ваъда бераман.

Изоҳ
Асосий янгиликлар