9-mart kuni Andijonda O‘zbekiston Oliy sudi raisi Kozimjon Komilov va Oliy sud sudyalari tomonidan sayyor qabul o‘tkazildi. Sayyor qabulda Isroil Sayidnazarovning murojaati ham ko‘rib chiqildi. Bu haqda “Daryo” muxbiri xabar bermoqda.
60 yoshli Isroil Sayidnazarov Marhamat tumani Beshmirza mahallasidan, kasbi quruvchi. 2017-yilda Toshkent viloyatining Zangiota tumanida mehnat qilgan. Ijarada yashayotgan xonadoniga kechasi noma’lum kimsalar bostirib kirgan. Shunda u o‘zini himoya qilish maqsadida qarshilik qilishga uringan va natijada baxtsiz hodisa tufayli bosqinchilarga og‘ir shikast yetkazgan.
2017-yilning 27-mart kuni unga Zangiota tumani sudi tomonidan Jinoyat Kodeksining 104-moddasi 3-qismi “a” bandi (ikki yoki undan ortiq shaxsga nisbatan qasddan badanga og‘ir shikast yetkazish) bilan to‘rt yilga ozodlikdan mahrum qilish jazosi tayinlangan. O‘z aybiga iqrorligi va pushaymonligi tufayli 2018-yilning 15-yanvarida Jinoyat ishlari bo‘yicha Navoiy shahar sudi tomonidan belgilangan jazo shartli ravishda axloq tuzatish ishlariga almashtirilgan.
Isroil Sayidnazarov Oliy sud raisiga yoshi va belgilangan jazodan to‘g‘ri xulosa chiqarganini aytib, jazodan ozod etishlarini iltimos qildi. Uning iltimosi Marhamat tumani sudi tomonidan qayta ko‘rib chiqildi va JKning tegishli moddalariga asosan o‘talmay qolgan 10 oy 13 kun jazo olib tashlanib, muddatidan ilgari shartli ozod qilindi.
— Bugungi murojaatim qanoatlantirilib, qayta ko‘rib chiqilganligidan xursandman, — deydi Isroil Sayidnazarov. – Umrimning qolgan qismini yaxshi ishlarga sarflashga va’da beraman.
Izoh (0)