6 мартнинг эътиборга молик янгиликлари — «Дарё» дайжестида.
Шавкат Мирзиёев Ўзбекистонда ҳукуматни шакллантириш тартибига доир қонунни имзолади.
Жорий йилнинг 1 апрель санасидан кучга кирадиган мазкур қонунга биноан, Вазирлар Маҳкамаси аъзолари номзоди Олий Мажлис Қонунчилик палатаси мажлисида кўриб чиқилиб, маъқулланганидан кейингина Президент томонидан лавозимга тасдиқланиш тартиби жорий этилмоқда.
***
Бош прокуратура: Гулнора Каримова энди жазони умумий тартибли колонияда ўтайди.
Г.Каримова жазони ўташ тартиби ва шартларини қасддан бузганлиги сабабли жиноят-ижроия қонунчилигига мувофиқ, Ўзбекистон Республикаси ИИВ Жазони ижро этиш бош бошқармаси ҳузуридаги Пробация хизматининг тақдимномасига асосан, 2019 йил 5 мартда жиноят ишлари бўйича Яшнобод тумани суди томонидан унга нисбатан тайинланган жазонинг ўталмай қолган муддати озодликдан маҳрум қилиш жазоси билан алмаштирилиб, умумий тартибли колонияда ўташи белгиланган.
Эслатиб ўтамиз, олдинроқ Имон Каримова онасининг ўз хонадонидан ўғирлаб кетилганини маълум қилганди.
ЎзА эса журналист Исмат Хушевнинг (Канада, Торонто шаҳри) ушбу воқеалар юзасидан шахсий кузатув ва хулосаларини эълон қилди.
***
Қорақалпоғистонда ёши 50-60 млн йилга тенг «динозавр тухумлари» бор.
Фанда «Моераки тошлари« деб ном берилган шарсимон тошлар геологик нуқтаи назардан олиб қараганда, кальций билан океаннинг минераллашган тузларининг ҳамда созли тупроқнинг бирикишидан ҳосил бўлади.
Нукусдан 30 километр олисда жойлашган Амударё туманидаги ушбу тошлар Тетис уммони эсдаликларидир.
***
Россия соғлиқни сақлаш вазири Москва — Тошкент рейси давомида тоби қочган ўзбекистонлик аёлга тиббий ёрдам кўрсатди.
Вазир вазиятни ҳаёт учун хавфли эмас деб топди ва ўзи доим олиб юрадиган аптечкадан дори-дармонлар олиб келди. Уларни қабул қилгандан сўнг йўловчи аёлнинг ҳолати яхшиланди.
***
Сурхондарёда Миллий гвардия, ички ишлар ва чегара қўшинларига ишга жойлашни ваъда қилган «ДХХ ходимлари» ушланди.
Мазкур шахслар ўзларини гўёки Давлат хавфсизлик хизмати идораларида ишлайман дея таништириб, содда одамларнинг ишончига кириб, уларнинг фарзандларини олий ўқув юртига ўқишга киритиш, муддатли ҳарбий хизматга юбориш ва ҳуқуқ-тартибот идораларига ишга жойлаштиришни ваъда қилиб, улардан пул талаб қилиб келган.
Изоҳ (0)